ओलम्पिक छनोटको मिति तोक्न निर्देशन

अन्तर्राष्ट्रिय ओलम्पिक कमिटी (आईओसी)ले टोकियो ओलम्पिकको छनोट प्रतियोगिताको मिति चाँडै तोक्न निर्देशन दिएको छ । आईओसीले छनोट प्रतियोगिताको मिति तोक्ने सबै अन्तर्राष्ट्रिय महासंघलाई निर्देशन दिएको हो ।

कोरोनाभाइरस महामारीकाबीच प्रतियोगिता रद्द गर्ने र अयोजना गर्ने सबै विकल्पमा योजना बनाउन सहयोग गर्न आईओसीले महासंघलाई भनेको छ । गत महिना आईओसीले टोकियो ओलम्पिक छनोटका लागि २९ जुन २०२१ सम्मको नयाँ टाइमलाइन दिएको थियो ।

विश्वभर महामारीको रुपमा फैलिएको कोरोना भाइरसका कारण यस वर्ष तय भएको ओलम्पिक एक वर्ष पछिलाई सारिएको हो । आईओसीले अन्तर्राष्ट्रिय महासंघको क्यालेन्डरमा देखिएको अनिश्चितताका कारण प्रतियोगिताको समय र स्थान निर्धारण हुन बाँकी रहेको जनाएको छ ।

‘प्रतियोगिताको मितिहरु र स्थानहरु टुङ्गो भएपछि हामीलाई सूचित गराउन अनुरोध गर्छौँ । जसलाई सकेसम्म चाँडो छनोट प्रणालीमा समावेश गर्न सकियोस्,’ आईओसीले भनेको छ । संशोधित छनोट प्रणाली बनेपछि आईओसीको स्पोर्ट्स अपरेसन म्यानेजरले सम्भावित आकस्मिक योजनाको बारेमा महासंघसँग नजिकबाट सहयोग जारी राख्ने र ओलम्पिक छनोट प्रतियोगिता हुन नसकने अवस्थामा पनि काम गर्ने आईओसीले जनाएको छ ।

आईओसी स्पोर्ट्स डिपार्टमेन्ट र अन्तर्राष्ट्रिय महासंघहरूले छनोट प्रणालीको आवश्यक अनुकुलनलाई अन्तिम रूप दिन काम गरिरहेको आईओसीले जनाएको छ । आईओसीले टोकियो ओलम्पिकलाई कम खर्च हुने खेल बनाउनसमेत काम गरिरहेको जनाएको छ ।

Leave a Reply

Your email address will not be published. Required fields are marked *