पाकिस्तान टि-२० विश्वकप सेमिफाइनल पुग्ने पहिलो टिम

युएई र ओमान जारी टि-२० विश्वकपमा सेमिफाइलन पुग्ने पहिलो टिम पाकिस्तान बनेको छ। सुपर १२को समूह २ मा लागतार चौथो जित निकाल्दै पाकिस्तान प्रतियोगिताको सोमिफाइनल पुगेको हो।

प्रतियोगितामा लगातार चौथो जित निकाल्ने क्रममा मंगलबार राति भएको खेलमा पाकिस्तानले नामिबियालाई ४५ रन हरायो। पाकिस्तानले यसअघि भारत, न्युजिल्याण्ड र अफगानिस्तानलाई पराजित गरेको थियो ।

पाकिस्तान ४ जितपछि ८ अंक जोडेर शीर्ष स्थानमा छ । पाकिस्तानले अब सुपर १२ मा स्कटल्याण्डसँग खेल्न बाँकी छ । सुपर १२ मा नामिबियाको यो दोस्रो हार हो ।

अबुधाबीमा भएको खेलमा पाकिस्तानले दिएको १९० रनको लक्ष्य पछ्याएको नामिबियाले २० ओभरमा ५ विकेट गुमाएर १४४ रन मात्र बनाउन सक्यो । नामिबियाका लागि डेभिड विजाले अविजित रहँदै सर्वाधिक ४३ रन बनाए । क्रेग विलियम्सले ४० रन जोडे । पाकिस्तानका हसन अली, इमाद वासिम, हारिस राउफ र शदाब खानले एक एक विकेट लिए ।

त्यसअघि टस जितेर पहिले ब्याटिङ गरेको पाकिस्तानले कप्तान आबर अजाम र विकेटकिपर मोहम्मद रिजवानको अर्धशतक मद्दतमा दुई विकेट गुमाएर १८९ रन बनाएको थियो । रिजवानले ५० बल खेल्दै ८ चौका र ४ छक्का मद्दतमा अविजित ७९ रन बनाए ।

यस्तै बाबरले ४९ बल खेल्दै ७ चौका मद्दतमा ७० रन जोडे । पहिलो विकेटका लागि यी दुईले ११३ रनको साझेदारी गरेका थिए । यस्तै मोहम्मद हाफिजले १६ बल खेल्दै ५ चौका मद्दतमा अविजित ३२ रन जोडे । नामिबियाका डेभिड विजा र जान फ्राइलिंकले समान एक विकेट लिए ।

Facebook Comments Box