Read Time:1 Minute

उपाधि होडमा रहेको मनाङ मर्स्याङ्दीलाई धक्का लागेको छ। शनिबार भएको खेलमा थ्री स्टार क्लबसँग १–१ गोलको बराबरी खेलेसँगै मनाङलाई उपाधि होडमा धक्का लागेको हो ।

यता, मनाङ बराबरीमा रोकिँदा उपाधि यात्रामा मछिन्द्र क्लबलाई प्रत्यक्ष फाइदा भएको छ। ३ चरणको खेलमात्र बाँकी रहँदा मछिन्द्रले मनाङमाथि ६ अंकको स्पष्ट अग्रता कायम गरेको छ। मछिन्द्रको २६ अंक छ भने मनाङको २० अंक छ।

खेलको ६२ औं मिनेटमा वैकल्पिक खेलाडीको रुपमा मैदान पसेका दयानन्द सिंहले गोल गर्दै मनाङलाई सुरुआती अग्रता दिलाएका थिए । कप्तान अन्जन विष्टको क्रसमा पुजन उपरकोटीको स्थानमा मैदान पसेका दयानन्दले हेडर मार्फत गोल गरे ।

तर, खेलको ७१ औं मिनेटमा ऋतिक खड्काले गोल गर्दै थ्री स्टारलाई १-१ गोलको बराबरीमा ल्याएका थिए । घानिफोको पासमा उनले बक्स बाहिरबाट प्रहार गरेको बल पोस्टमा लाग्दै जाली चुमेको थियो ।