Read Time:1 Minute

इटालियन सिरि एमा शीर्ष स्थानको नापोलीले सानदार जित निकालेको छ। शुक्रबार राति भएको खेलमा नापोलीले घरेलु मैदानमा युभेन्ट्समाथि ५–१को जित निकाल्यो।

नापोलीको सानदार जितमा भिक्टर ओसिमेनले २ गोल गर्दा अमीर रहमानी, ख्रिचा काभाराच्कैया, इल्फ इल्मसले गोल गरेका थिए। यता, युभेन्ट्सका एन्जेल डिमारियाले गोल गरेका थिए।

१४औं मिनेटमा ओसिमेनको गोलमा नापोलीले अग्रता लियो । ३९औं मिनेटमा काभाराच्कैयाले नापोलीको अग्रता दोब्बर बनाए। ४२औं मिनेटमा डि मारियाले गोल गरेपछि पहिलो हाफ २–१मा सकियो।

पहिलो हाफमा २–१को अग्रता लिएको नापोलीले दोस्रो हाफमा थप ३ गोल गरेको थियो। उसका लागि ५५औं मिनेटमा रहमानी, ६५औं मिनेटमा ओसिमेन र ७२औं मिनेटमा इल्मसले गोल गरेका थिए।

यो जितसँगै नापोलीले शीर्ष स्थानमा १० अंकको फराकिलो अग्रता बनाएको छ। उसले १८ खेलमा ४७ अंक जोडेको छ भने एक खेल कम खेलेको एसी मिलानको १७ खेलमा ३७ अंक छ। युभेन्ट्स भने पराजित भएपनि ३७ अंक नै जोड्दै तेस्रो स्थानमा उक्लिएको छ।