Read Time:1 Minute

उपाधि जित्ने लक्ष्यसहित भारत पुगेको नेपाली यू १८ टिम महिला साफ च्याम्पियनसिपको पहिलो खेलमै लज्जास्पद हार बेहोर्न बाध्य भएको छ। मंगलबार भारतको जम्देशपाुरमा भएको खेलमा नेपाल भारतसँग ७-०ले पराजित भयो ।

नेपालले पहिलो हाफमै तीन गोल खाएको थियो। दोस्रो हाफमा थप ४ गोल गरेको थियो।

खेलको १७ मिनेटमा भारतले अग्रता लियो । उसका लागि प्रियंका सुजीशले पहिलो गोल गरिन्। दुई मिनेटपछि लिन्डा कोम सेर्तोले अग्रता दोब्बर पारेकी थिइन्। ३७ मिनेटमा लिन्डाले व्यक्तिगत दोस्रो गोल गर्दा भारत पहिलो हाफमा ३-० ले अघि बढ्यो।

७४ मिनेटमा अपूर्णाले चौथो गोल गर्दा ८१ मिनेटमा पूर्णिमाले पाँचौ गोल गर्न सफल भइन्। ८९ मिनेटमा सुनिता मुन्डाले छैटौं र इन्जुरी टाइमको तेस्रो मिनेटमा नितु लिन्डाले सातौं गोल गरेकी थिइन्।

प्रतियोगितामा आयोजक भारत, नेपाल र बंगलादेश गरी तीन टिमले भाग लिएका छन्। नेपालले आफ्नो दोस्रो खेल पर्सी बिहीबार बंगलादेशसँग खेल्नेछ।

नेपालले मार्च २१ मा फेरि भारतसँग खेल्दा मार्च २३ मा बंगलादेशसँग खेल्ने तालिका रहेको छ।