नेमार भन्छन्– उसलाई मुखमा हान्न नसकेकोमा दुःख लागेको छ

लिग वानअन्तर्गत शनिबार राति भएको पिएसजी र मार्सेलीबीच खेल निकै तनावपूर्ण बन्यो । खेलमा दुवै टिमका खेलाडीबीच पटक–पटक घम्सा–घम्सी र हात हालाहालको स्थिति सिर्जना भयो ।

रणभूमि जस्तै बनेको खेलमा ५ खेलाडीले रातो कार्ड र ११ खेलाडीले पहेँलो कार्ड पाए । खेलमा रातो कार्ड पाउनेमा पिएसजीका नेमार, लियोनार्दो पेरडेस र लेविन कुर्जार्वा थिए भने मार्सेलीका जोर्डन अमावी र डारिओ बेनेडेट्टोसम्म छन् ।

मैदानमा निकै पटक वाद–विवादमा देखिएका नेमारले खेल सकिएपछि मार्सेलीका डिफेन्डर अल्भारो गोन्जालेसलाई मुखमा हान्न नसकेकोमा दुःख लागेको बताएका छन् । खेलमा नेमार र गोन्जालेसबीच पटक–पटक विवाद भएको थियो । इन्जुरी समयमा झगडा सुरुहुन ठीकअघि उनकै ठाउकोमा थपथपाउँदा नेमारले रातो कार्ड पाएका थिए ।

‘मलाई यो कुरामा दुःख लागेको छ कि मैले ऊजस्तो बेवकुफलाई मुखमा हान्न सकिनँ,’ खेलपछि नेमारले ट्विटरमा लेखेका छन् । इन्जुरी समयमा रातो खाँदै मैदान बाहिरएपछि नेमारले अफिसियलसँग आफूहरुमाथि जातिवादी व्यवहार भएको बताए ।

नेमारले अफिसियलसँग भनेका थिए, ‘आफूहरुमाथि जातिवादी व्यहवार भयो, त्यसैले मैले उसलाई हिर्काएँ ।’ प्रशिक्षक थोमस टुचेलले पनि नेमारले आफूसँग जातिवादी व्यहवार भएको भनेको बताएका छन् ।

टुचेलले नेमारले आफूले भनेका कुरा यसरी सुनाए, ‘मैले मैदनमा उसले भनेको केही सुनिन, तर उसको व्यवहार जातिवादी थियो । पछि मलाई थाहा भयो, उसले डी मारियालाई नस्लवादी र रंगभेदी गाली गरेको रहेछ ।’

नेमारले ट्विटरमा आफूहरुमाथि जातिवादी व्यवहार भएको बताएपछि मार्सेलीका प्रशिक्षक आन्द्रे भिल्ला बोसले भनेका छन्, ‘फुटबलमा जातिवादको कुनै स्थान छैन । आज मैदानमा जे भयो त्यो जातिवादी मुद्दा थियो भन्ने मलाई लाग्दैन । तर, मैदानमा के भएको थियो त्यो छानविन गर्नुपर्छ ।’

Leave a Reply

Your email address will not be published. Required fields are marked *