महिला विश्वकप २०२३ को फाइनलपछिको समारोहमा स्पेनकी फरवार्ड जेनी हर्मोसोलाई ओठमा चुम्बन गरेपछि विवादामा परेका स्पेनिस फुटबल महासंघका अध्यक्ष लुइस रुबियालेसले राजीनामा दिएका छन्।
विवादमा मुछिएको २० दिनपछि अध्यक्ष रुबियालेसले राजीनामा दिएका हुन्। दुई साताअघि नै फिफाले ९० दिनका लागि अध्यक्षबाट निलम्बन गरेको थियो।
३३ वर्षीया हर्मोसोले चुम्बन सहमतिमा नभएको भन्दै गत मंगलबार कानुनी उजुरी दिएकी थिइन्। रुबियालेसले महासंघका कार्यवाहक अध्यक्ष पेड्रो रोचालाई राजीनामा बुझाएका छन्।
४६ वर्षीय उनले युइएफएको कार्यकारी समितिको उपाध्यक्ष पदबाट पनि राजीनामा दिएका छन्। व्यापक आलोचना भएर राजीनमा माग भए पनि रुबियालेसले राजीनामा दिन बारम्बार बेवास्ता गर्दै आएका थिए।
स्पेनिस फरवार्डमाथि यौन दुर्व्यवहार र जबरजस्ती गरेको अध्यक्षमाथि आरोप लगाइएको छ।
रुबियालेसले चुम्बन ‘आपसी सहमतिमा’ भएको दाबी गरे पनि फुटबलको विश्व प्रशासनिक निकाय फिफाले अस्थायी रूपमा उनलाई निलम्बन गरेको थियो।विश्वकप विजेतासहित ८१ खेलाडीले रुबियालेस आफ्नो स्थानमा रहँदा राष्ट्रिय टोलीबाट नखेल्ने बताएका थिए।
राजनीतिज्ञ, फुटबलर र सेलिब्रेटीहरू रुबियाल्सको विरुद्धमा बोलेका थिए। यस्तै प्रदर्शनकारीहरू गत साता उनको राजीनामा माग गर्न महासंघको मुख्यालयमा भेला भएका थिए।
