श्रीलंका पुलिसमाथि त्रिभुवन आर्मीको शानदार जित

एएफसी कपमा त्रिभुवन आर्मी क्लबले सानदार जित निकालेको छ। बुधबार घरेलु मैदानमा भएको खेलमा श्रीलंका पुलिस एफसीमाथि आर्मीले एक गोलले पछि परेको अवस्था उल्टाउँदै ५–१को जित निकाल्यो ।

पहिलो हाफमा २–१ को अग्रता बनाएको आर्मीले दोस्रो हाफमा ३ गोल थप्यो । आर्मीको जितमा नवयुग श्रेष्ठले दुई गोल गरे भने सन्तोष तामाङ, टंकबहादुर बस्नेत र सुदिल राईले एक–एक गोल गरे ।

आर्मी गोल गर्न चुकिरहेका बेला श्रीलंकन टोलीले २८औं मिनेटमा खाता खोल्यो । घानाका खेलाडी इभान्स एसान्तेले गोल गर्दै श्रीलंका पुलिसलाई अग्रता दिलाएका थिए । ४१औं मिनेटमा सन्तोष तामाङले आर्मीका लागि बराबरी गोल फर्काए । विपक्षी खेलाडीले क्लियर गर्न नसकेको बलमा सन्तोषले २५ यार्डबाट हाफ भलिमा शानदार गोल गरे । त्यसको दुई मिनेटपछि नै आर्मीले अर्को गोल गर्‍यो ।

कप्तान भरतको पासमा नवयुग श्रेष्ठले हेडर गोल गर्दै आर्मीलाई २–१ को अग्रता दिलाए । दोस्रो हाफमा पनि आर्मीले दबाब कायमै राख्यो । ५०औं मिनेटमा श्रीलंकन पुलिसका गोलकिपरको गल्तीमा टंकबहादुर बस्नेतले गोल गर्दै आर्मीलाई ३–१ को अग्रता दिलाए ।

वैकल्पिक खेलाडीको रुपमा मैदान प्रवेश गरेका सुदिल राईले ८३ औं मिनेटमा गोल गर्दै आर्मीलाई ४–१ को अग्रता दिलाए । उनी ६३औं मिनेटमा टंक बस्नेतको स्थानमा मैदान प्रवेश गरेका थिए । इन्जुरी टाइममा नवयुगले व्यक्तिगत दोस्रो गोल गर्दा आर्मीले ५–१ गोल अन्तरको शानदार जित निकाल्यो।

जितसँगै दोस्रो चरणमा पुगेको आर्मीले भारतको बेंगलुरु एफसीसँग अप्रिल १४ मा खेल्नेछ । सन् २०१३ मा स्थापना भएको बेंगलुरुको कप्तान सुनिल क्षेत्री छन् र यो क्लबले २ पटक आई लिग र एक पटक इन्डियन सुपर लिगको उपाधि जितेको छ । सन् २०१४ देखि नै लगातार एएफसी कप खेल्दै आएको बेंगलुरु २०१६ मा एएफसी कपको फाइनलमा पुगेको थियो ।

प्रिलिमिनरीकै अर्को खेलमा माल्दिभ्सको क्लब इगल्स भुटानको थिम्पु सिटी एफसीलाई २–० ले पराजित गर्दै दोस्रो चरणमा पुगेको छ । क्लब इगल्सले पनि १४ अप्रिलमै बंगलादेशको अबहानी लिमिटेडको विजेतासँग खेल्नेछ ।

Leave a Reply

Your email address will not be published. Required fields are marked *