फातीले कीर्तिमान बनाउँदा स्पेन विजयी

अंसु फातीले कीर्तिमान बनाएको खेलमा स्पेन विजयी भएको छ। शनिबार राति घरेलु मैदानमा भएको खेलमा स्पेनले युक्रेनलाई ४–०ले पराजित गर्दै युइएफए नेसन्स लिगमा पहिलो जित निकाल्यो ।

युक्रेनविरुद्ध पहिलो रोजाइमै परेक १७ वर्षे स्ट्राइक फातीले ३२औं मिनेटमा उत्कृष्ट गोल गरेका थिए । सो गोलसँगै फातीले ९५ वर्षको पुरानो कीर्तिमान तोड्दै स्पेनका लागि सबैभन्दा कम उमेरमा गोल गर्ने खेलाडी बने । उनले १७ वर्ष ३११ दिनको उमेरमा स्पेनका लागि गोल गर्न सफल रहे ।

फाती च्याम्पियन्स लिगको इतिहास र स्पानिस लिगमा समेत सबैभन्दा कम उमेरमा गोल गर्ने खेलाडी हुन् । पहिलो रोजाइमा मैदानमा उत्रिएका फाती नेसन्स लिगमा प्लेइङ सेटमा रहेर खेलको सुरुवात गर्ने सबैभन्दा युवा खेलाडी बनेका छन् । यसअघि जुआन एराजुकिनको नाममा थियो । उले सन् १९२५ मा १८ वर्ष ३ ४४ दिनमा स्विटरल्यान्डविरुद्ध गोल गरेका थिए ।

गिनी बिसाउमा जन्मिएका फाती ५ वर्षको उमेरमा परिवारसहित स्पेन आएका हुन् । स्पेनिस क्लब बार्सिलोनाको एकेडेमी ला मासियाको उत्पादन फाती अघिल्लो सिजन बार्सिलोनाको सिनियर टिममा डेब्यू गरेका थिए । उनी ८४ वर्षको इतिहासमा स्पेनका सबैभन्दा कम उमेरका खेलाडी बनेका छन् । पछिल्लो बिहीबार मात्र उनले जर्मनीविरुद्धको खेलमा डेब्यु गरेका थिए ।

स्पनेको जितमा फातीका अलावा कप्तान सर्जियो रामोसले २ गोल गरे भने अर्का युवा स्ट्राइकर फेरान टोरेसले १ गोल गरेका थिए । स्पेनले पहिलो हाफमा ३ र दोस्रो हाफमा २ गोल गरेको थियो ।

खेलमा तेस्रो मिनेटमै पेनाल्टीमा गोल गर्दै रामोसले गोल गर्दै स्पेनलाई अग्रता दिलाएका थिए । २९औं मिनेटमा रामोसले नै हेडिङ गोल गर्दै स्पेनको अग्रता दोब्बर बनाएका थिए । फातीले ३२औं मिनेटमा डिबक्स बाहिरबाट उत्कृष्ट गोल गर्दै स्पेनलाई ३–०को अग्रता दिलाएका थिए ।

पहिलो हाफमा ३–०को अग्रता लिएको स्पेनले दोस्रो हाफमा १ गोल थपेको थियो । ८६औं मिनेटमा २० वार्षीय स्ट्राइकर टोरेसले गोल गर्दै स्पेनलाई सहज जित दिलाए । टोरेसले पनि अघिल्लो साता जर्मनविरुद्धको खेलबाट राष्ट्रिय टिममा डेब्यू गरेका थिए ।

पहिलो खेललमा जर्मनीसँग बराबरी खेलेको स्पेन यो जितपछि लिग एको समूह ४ मा ४ अंक जोड्दै शीर्ष स्थानमा छ । पहिलो खेलमा स्वीट्जरल्यान्डलाई पराजित गरेको युक्रेन ३ अंकसहित दोस्रो स्थानमा छ ।