स्पेनिस ला लिगा अन्तर्गत सेभिल्लाविरुद्धको खेलमा दायाँ हात भाँचिएपछि कप्तान मेसी बिना नै मैदानमा उत्रेको बार्सिलोनाले च्याम्पियन्स् लिगको तेस्रो खेलमा इटालियन क्लब इन्टर मिलानलाई पराजित गरेको छ ।
घरेलु मैदान क्याम्प नेउमा भएको खेलमा बार्सिलोनाले इन्टर मिलानलाई २–०ले पराजित गर्दे च्याम्पियन्स् लिगमा शतप्रतिशत नतिजा निकालेको छ । शतप्रतिशत नतिजा निकालेको बार्सिलोनाले ९ अंक जोड्दै समूह बीको शीर्ष स्थानमा छ भने इन्टर मिलान ६ अंकका साथ दस्रो स्थानमा छ । यस्तै, टोट्नह्याम र पिएसभी इन्डहोभेनको १–१ अंक मात्र छ ।
बार्सिलोनालाई जित दिलाउन राफिन्हा र जोर्डी अल्बाले गोल गरे । खेलको ३२औं मिनेटमा राफिन्हाको गोलबाट बार्सिलोनाले इन्टरमाथि १–० को अग्रता लिएको थियो । उनले लुइस सुआरेजको क्रसमो गोल गरेका थिए ।
८३औं मिनेटमा जोर्डी अल्बाले गोल गर्दैै बार्सिलोनाको जित निश्चित गरेका थिए । उनले इभान राकाटिचको पासलाई सदुपयोग गर्दै गोल गरेका थिए ।
बुधबार राति क्याम्प नेउमा भएको खेल बार्सिलोनाले अधिकांश समय बल आफ्नो नियन्त्रणमा लिएको थियो । उसले ६८ प्रतिशत बल आफ्नो नियन्त्रणमा लिएको थियो । बार्सिलोनाले खेल अवधिमा इन्टरको पोस्टमा २१ प्रहार गरेको थियो । जसमध्ये ११ प्रहार टार्गेटमा थियो । यस्तै इन्टर मिलानले ९ सट मात्र प्रहार गरेकोमा २ सट मात्र टार्गेटमा प्रहार गरेको थियो ।
खेलमा २२ फाउल गरेको इन्टर मिलानका तीन खेलाडीले पहेँलो कार्ड पाएका थिए भने बार्सिलोनाले ११ फाउल गर्दा एउटा मात्र पहेँलो कार्ड पाएको थियो ।
समूह बीकै अर्को खेलमा इंग्लिस क्लब टोटनह्याम हर्सपर बराबरीमा रोकिएको छ । उसलाई पिएसपी इन्डहोभेनले २–२ को बराबरीमा रोकेको हो । टोनटह्यामका लागि लुकास माउरा र ह्यारी केनले गोल गरेका थिए भने पिएसभीका लागि हिर्भिङ लोजानो र लूक डे जोङले गोल गरेका थिए । टोटनह्याम च्याम्पियन्स लिगमा अझै जित बिहीन छ ।