केएल राहुल, जडेजा र श्रेयस चम्किए, न्युजिल्यानडविरुद्ध भारतको सहज जित

January 26, 2020January 26, 2020

Read Time:2 मिनेट

न्युजिल्यान्ड भ्रमणमा रहेको भारतले टि–२० सिरिजमा लगातार दोस्रो जित निकालेको छ । आइतबार अकल्यान्डमा भएको खेलमा भारतले ७ विकेटको जित निकालेको हो । पहिलो टि–२० भारतले ६ विकेटले जितेको थियो ।

यो जितसँगै भारतले ५ खेलको सिरिजमा २–०को अग्रता लिएको छ । यी दुईबीचको तेस्रो टि–२० बुधबार ह्यामिल्टनमा हुने छ ।

दोस्रो टि–२०मा भारतलाई जित दिलाउन केएल राहुल र श्रेयस ऐयरले ब्याटिङमा तथा रविन्द्र जडेजाले बलिङमा उत्कृष्ट प्रदर्शन गरे । न्युजिल्यान्डले दिएको १३२ रनको सामान्य लक्ष्य भारतले १७.३ ओभरमा ३ विकेट गुमाउँदै भेट्टायो ।

भारतका लागि राहुलले सार्वधिक ७५ रन बनाए भने श्रेयस ऐयरले ४४ रन बनाए । राहुलले ५० बल खेल्दै ३ चौका र २ छक्का प्रहार गरे भने ऐयरले ३३ बलमा १ चौका र ३ छक्का प्रहार गरे । यी दुई तेस्रो विकेटका लागि ८६ रनको साझेदारी गरेका थिए ।

यस्तै, कप्तान विराट कोहलीले ११ र रोहित शर्मा तथा शिवम दुवेले समान ८ रन बनाए । न्युजिल्यान्डका लागि टिम साउदीले २ तथा इश सोधीले १ विकेट लिए ।

यसअघि पहिला ब्याटिङ गरेको न्युजिल्यान्डले निर्धारित २० ओभरमा ५ विकेट गुमाउँदै १३२ रन मात्र बनाउन सक्यो । उसका लागि मार्टिन गुप्टिल र टिम सेइफेर्टले समान ३३ रन बनाए भने कोलिन मुन्रोले २६ र रोस टेलरले १८ रन बनाए ।

न्युजिल्यान्डलाई सस्तैमा रोक्ने क्रममा रविन्द्र जडेजाले ४ ओभरमा १८ रन खर्चंदै २ विकेट लिए । यस्तै जस्प्रित बुमराह, शिवम दुवे र शार्दुल ठाकुरले समान १ विकेट लिए ।