सहिद स्मारक ए डिभिजन लिगमा जावलाखेल युथ क्लबले लागतार दोस्रो जित निकालेको छ। बिहीबार एन्फा कम्प्लेक्स सातदोबाटोमा भएको खेलमा जावलाखेलले एनआरटीलाई २–१ले हरायो।
जावलाखेलको जितमा कप्तान सिमान्त थापा र फोडे फोफानाले एक गोल गरे । एनआरटीका सन्जिव विष्टले एक गोल फर्काए ।
पहिलो हाफ गोलरहित बराबरीमा सकिएको खेलमा ६८ औं मिनेटमा सिमान्तले गोल गर्दै जावलाखेललाई सुरुआती अग्रता दिलाएका थिए । ७७ औं मिनेटमा फोफानाले गोल गर्दै जावलाखेलको अग्रता दोब्बर बनाए।
८० औं मिनेटमा सन्जिवले गोल गर्दै एनआरटीलाई खेलमा फर्काउने प्रयास गरे। तर, त्यसपछि गोल नहुँदा जावलाखेल विजयी भयो।
जितसँगै जावलाखेलले २ खेलमा ६ अंक जोडेको छ । उसले पहिलो खेलमा लिग च्याम्पियन मछिन्द्रलाई हराएको थियो। एनआरटीको यो लगातार दोस्रो हार हो।
