दोस्रो संस्करणको केपी ओली कप फुटबल प्रतियोगिता फाल्गुन ११ गतेदेखि सुरु हुने भएको छ।
आयोजक राष्ट्रिय युवा संघ नेपालले बुधबार काठमाडौंमा पत्रकार सम्मेलन गर्दै प्रतियोगता फागुन ११ देखि १९ गतेसम्म सञ्चालन हुने जनाएको हो। प्रतियोगिताको फाइनलबाहेकका अन्य खेलहरु एन्फा टेक्निकल मैदान च्यासलमा खेलाइने आयोजकले जनाएको छ।
प्रतियोगितामा नेपालको ‘ए’ डिभिजन क्लबका अतिरिक्त विदेश टोलीको समेत सहभागिता रहने पनि राष्ट्रिय युवा संघ नेपालका अध्यक्ष क्षितिज थेबेले जानकारी दिए।
प्रतियोगितामा विजयी टिमले ११ लाख र उपविजेताले पाँच लाख रुपैयाँ प्राप्त गर्ने छन्। यस्तै, प्रतियोगिताको सर्वोत्कृष्ट खेलाडी एक लाख रुपैयाँ पाउने आयोजक युवा संघले जनाएको छ।
यस्तै, विधागत उत्कृष्ट खेलाडी र उदीयमान खेलाडीले ५० हजार रुपैयाँ प्राप्त गर्ने छन्।
राष्ट्रिय युवा संघ नेपालका अध्यक्ष थेबेले खेलकुदको बिकासका लागि चासो जगाउनका लागि प्रतियोगीता आयोजना गरिएको बताए।