आइसिसी विश्वकप लिग–२को आफ्नो अन्तिम खेलमा नामिबिया विजयी भएको छ। आफ्नो अन्तिम खेलमा नामिबियाले युएईलाई उसकै मैदानमा ७ विकेटले हरायो।
दुबई क्रिकेट स्टेडियममा युएईले दिएको १६७ रनको सामान्य लक्ष्य नामिबियाले २८.२ ओभरमा ३ विकेटको क्षतिमा भेट्टायो।
नामिबियाका लागि माइकल भानले ५३ बलमा सर्वाधिक ७१ रन र लोहाड्रि लाउरेन्स ४७ रनको योगदान दिए। युएईका लागि जुनेद सिद्धिकि, नाहोर खान र राहुल भाटीयाले समान १ विकेट लिए।
त्यसअघि पहिले ब्याटिङ गरेको युएईले ५० ओभरमा ९ विकेट गुमाएर १६६ रन बनायो। उसका कप्तान सिपी रिजवानले १४० बलमा नटआउट ६० रन बनाए। उनले २ चौका मात्र प्रहार गरे।
यस्तै, रोहन मुस्ताफा २५, वृत्य अरबिन्दले १८ रन रन बनाए । युएईलाई सस्तैमा रोक्ने क्रममा नामिबियाका लागि टांगेनी लुकामेनी, बेन सिकोन्गो र कप्तान ग्रहार्ड इरास्मसले समान २ विकेट लिए।
यो जितसँगै नामिबिया सिरिजमा ३९ अंकसहित तेस्रो स्थानमा छ । र, उसको विश्वकप छनोटमा पुग्ने सम्भावना जीवितै छ। यता, युएई २९ अंकका साथ पाँचौं स्थानमा छ। उसको पनि विश्वकप छनोटमा पुग्ने सम्भावना जीवितै छ ।
