सुनसरीको इटहरीमा भएको प्रधानमन्त्री कप महिला राष्ट्रिय प्रतियोगिताको उपाधि सुदूरपश्चिम प्रदेशले जितेको छ । शनिबार इटहरीमा भएको फाइनलमा प्रदेश १ लाई ६ विकेटले हराउँदै सुदुरपश्चिमले उपाधि जितेको हो ।
पहिला ब्याटिङ गर्दै प्रदेश १ ले दिएको १०२ रनको लक्ष्य सुदूरपश्चिमले १ बल अगावै भेट्टायो । उसका लागि सम्झना खड्काले ३३ बलमा २ चौकासहित अविजित सर्वाधिक २७ रन बनाउँदा डली भट्टले १६ बलमा १ चौका र २ छक्कासहित विष्फोटक २२ रनको योगदान गरिन्।
यस्तै, कविता जोशीले १९ रन रन बनाइन् । बलिङमा सवनम राई, हिरनमई रोय, रुविना क्षेत्री र संगीता राईले समान १ विकेट लिए ।
त्यसअघि टस जितेर पहिलो ब्याटिङ गरेको प्रदेश १ ले २० ओभरमा ५ विकेटको क्षतिमा १०१ रन बनायो । उसका लागि ओपनर काजल श्रेष्ठले सर्वाधिक ४८ रन बनाउँदा अप्सरी बेगमले १५ र कप्तान रुविना क्षेत्रीले १४ रन बनाइन्।
बलिङमा सुदूरपश्चिमकी मनिषा चौधरीले २ विकेट लिइन् भने श्रतु कनोजियाले १ विकेट लिइन् ।
विजेताको बनेको सुदुरपश्चिमले ५ लाख रुपैयाँ प्राप्त गर्दा प्रदेश १ ले ३ लाख रुपैयाँ पायो।
सुदूरपश्चिमलाई उपाधि दिलाउन मुख्य भूमिका खेलेकी कप्तान कविता कुँवर प्रतियोगिताको सर्वोत्कृष्ट खेलाडी बनिन्। उनले ३० हजार रुपैयाँ प्राप्त गरिन्।
