एनएसजेएफ पल्सर स्पोर्टस् अवार्डको उत्कृष्ट ५ को मनोनयन सार्वजनिक भएको छ । मंगलबार काठमाडौंमा एक कार्यक्रमबीच आयोजक नेपाल खेलकुद पत्रकार मञ्चले उत्कृष्ट ५ को मनोनयन सार्वजनिक गरेको हो ।
मञ्चले मंगलबार वर्षको उत्कृष्ट पुरुष, महिला खेलाडी, युवा खेलाडी र वर्षको उत्कृष्ट प्रशिक्षक गरी ४ विधाको मनोनयन सार्वजनिक गरेको हो । पिपुल्स च्वाइस अवार्डको मनोनयन यसअघि नै सर्वाजनिक भइसकेको छ ।
एनएसजेएफ पल्सर स्पोट्र्स अवार्डको मनोनयनमा क्रिकेटको वचश्र्व रहेको छ । ५ विधाको उत्कृष्ट ५ को मनोनयनमा क्रिकेटका ६ खेलाडी मनोनयनमा पर्न सफल भएका छन् । यस्तै फुटबलका ४, भलिबलका ३, एथ्लेटिक्स, प्याराग्लाइडिङ, जुडो र ब्याड्मिन्टनका २–२ तथा गल्फ, जुडो, तेक्वान्दो, कराँते र शारिरीक सुगठनका १–१ खेलाडी मनोनयनमा परेका छन् ।
क्रिकेटका पारस खड्का र सोमपाल कामी उत्कृष्ट पुरुष खेलाडी, सीता रानामगर उत्कृष्ट महिला खेलाडी, ललितनारायण राजवंशी उत्कृष्ट युवा खेलाडी, जगत टमटा उत्कृष्ट प्रशिक्षक र सन्दीप लामिछाने पिपुल्स च्वाइस विधामा मनोनयनमा परेका छन् । यस्तै, फुटबलकी सावित्रा भण्डारी उत्कृष्ट महिला र पिपुल्स च्वाइसमा मनोनयनमा पर्दा मञ्जलीकुमारी योञ्जन उत्कृष्ट युवा खेलाडी र हरि खड्का उत्कृष्ट प्रशिक्षकमा मनोनयनमा परेका छन् ।
यसैगरी भलिबलकी रेश्मा भण्डारी पिपुल्स च्वाइस, सरस्वती चौधरी उत्कृष्ट महिला खेलाडी र ज्ञानेन्द्र विष्ट उत्कृष्ट प्रशिक्षकमा मनोनयनमा परेका छन् । यस्तै, एथ्लेटिक्सका अजितकुमार यादव उत्कृष्ट युवा र धनीराम चौधरी उत्कृष्ट प्रशिक्षकमा मनोनयनमा परेका छन् भने प्याराग्लाइडिङका युकेश श्रेष्ठ र योगेश भट्टराई क्रमशः उत्कृष्ट पुरुष खेलाडी र प्रशिक्षकममा मनोनयनमा परेका छन् । जुडोकी मनिता श्रेष्ठ उत्कृष्ट महिला र इन्द्रबहादुर श्रेष्ठ उत्कृष्ट पुरुष खेलाडीमा मनोनयनमा परेका छन् ।
ब्याडमिन्टनका प्रिन्स दाहाल पब्लिकि च्वाइस र उत्कृष्ट युवा खेलाडीमा मनोनयनमा पर्दा गल्फका शुक्रबहादुर राई उत्कृष्ट पुरुष, तेक्वान्दोकी निमा गुरुङ उत्कृष्ट महिला, कराँते विजय श्रेष्ठ युवा खेलाडी र शारिरीक सुगठनका महेश्वर महर्जन पिपुल्स च्वाइस अवार्डमा मनोनयनमा परेका छन् ।
कुन विधामा को–को मनोनयनमा ?
उत्कृष्ट पुरुष खेलाडी
- पारस खड्का (क्रिकेट)
- सोमपाल कामी (क्रिकेट)
- युकेश गुरुङ (प्याराग्लाइडिङ)
- शुक्रबहादुर राई (गल्फ)
- इद्रबहादुर श्रेष्ठ (जुडो)
उत्कृष्ट महिला खेलाडी
- सावित्रा भण्डारी (फुटबल)
- सीता रानामगर (क्रिकेट)
- सरस्वती चौधरी (भलिबल)
- मनिता श्रेष्ठ (जुडो)
- नीमा गुरुङ (तेक्वान्दो)
उत्कृष्ट युवा खेलाडी
- ललित नारायण राजवंशी (क्रिकेट)
- मञ्जलीकुमारी योञ्जन (फुटबल)
- प्रिन्स दाहाल (ब्याडमिन्टन)
- अजितकुमार यादव (एथ्लेटिक्स)
- विजय श्रेष्ठ (कराँते)
उत्कृष्ट प्रशिक्षक
- जगत टमटा (क्रिकेट)
- हरि खड्का (फुटबल)
- योगेश भट्टराई (प्याराग्लाइडिङ)
- धनीराम चौधरी (एथ्लेटिक्स)
- ज्ञानेन्द्र विष्ट (भलिबल)
पिपुल्स च्वाइस अवार्ड
- सन्दीप लामिछाने (क्रिकेट)
- सावित्रा भण्डारी (फुटबल)
- रेश्मा भण्डारी (भलिबल)
- पिन्स दाहाल (ब्याडमिन्टन)
- महेश्वर महर्जन (शारिरीक सुगनठन)
अवार्ड विजेता के पाउँछन् ?
१७ असारमा कमलादीस्थित नेपाल प्रज्ञा प्रतिष्ठानमा हुने कार्यक्रममा ९ विधानमा अवार्ड प्रधान गरिने छ । उत्कृष्ट पुरुष, महिला, पिपुल्स च्वाइस तथा प्रशिक्षक विधाका विजेताले बजाजको एनएस १६० सीसीको मोटरसाइकल पाउने छन् । यस्तै अन्य विधाका विजेतालाई ५० हजार रुपैयाँसहित गिफ्ट ह्याम्पर पाउने छन् ।
लाइफटाइम एचिभमेन्ट अवार्ड, पारा एथलिटक, स्पेसल अवार्ड र टिम अफ दी इयर अवार्डको घोषणा असार १७ गते कार्यक्रमकै दिन गरिनेछ ।
एनएसजेएफ स्पोर्टस् अवार्डलाई हंशराज हुलासचन्द एन्ड कम्पनीले मुख्य प्रायोजक गरेको छ । यस्तै गोल्डस्टार र डिस मिडिया नेटवर्क मुख्य सह–प्रायोजक रहेका छन् । यसैगरी सूर्य नेपाल प्रालि, रुस्लान फुटबल, केल्मे नेपाल, सगरमाथा सिमेन्ट, रोयल सिंगी होटल, टाइमेक्स, होटल क्राउन प्लाजा, साहस स्पोर्ट्स, इमेजिङले पनि अवार्डलाई प्रायोजन गरेका छन् ।