ढाकामा पुष्पाले जितिन् कास्य

बंगलादेशमा भएको बंगबन्धु शेख मुजीव ढाका म्याराथनमा नेपाली धावक पुष्पा भण्डारीले कास्य पदक जितेकी छन् । दक्षिण एसियाली क्याटेगोरीमा अघिल्लो पटक स्वर्ण जितेकी पुष्पा यो पटक तेस्रो भएकी हुन् ।

पुष्पाले निर्धारित दूरी २ घण्टा ५५ मिनेट ३५ सेकेण्डमा पूरा गरिन् । उनले गत वर्ष निर्धारित दूरी २ घण्टा ५९ मिनेट ४१ सेकेण्डमा पूरा गरेकी थिइन् । पुष्पाले टाइमिङ सुधार गरे पनि स्वर्ण रक्षा गर्न सकिनन् ।

भारतकी आरती दत्तात्रय पाटिलले २ घण्टा ५३ मिनेट २८ सेकेण्डमा दौड पूरा गर्दै स्वर्ण जितिन् भने भारतकै ज्योती गवाटेले २ घण्टा ५४ मिनेट १५ सेकेण्डमा दूरी पूरा गर्दै रजत जितिन् ।

यसैगरी नेपालका दुई पुरुष खेलाडीले पनि दक्षिण एसियाली कोटामा प्रतिस्पर्धा गरेका थिए । तर उनीहरुले कुनै पदक जित्न सकेनन् । नेपालका किरण सिंह बोगटी २ घण्टा २३ मिनेट ४३ सेकेण्डमा दौड पूरा गर्दै पाँचौं स्थानमा रहे । शीर्ष चारमा भारतीय खेलाडीकै पकड रहँदा बुगाथा स्रिनुले २ घण्टा १६ मिनेट २६ सेकेण्ड समयसहित स्वर्ण जिते ।

प्रशिक्षक गुरुङले किरण र अर्का खेलाडी नरेन्द्र सिंह रावतले राम्रो समय निकालेको तर पदक जित्न भने नसकेको बताए ।

Facebook Comments Box