यू–१९ साफ च्याम्पियनसिप फुटबल प्रतियोगिता नेपालमा आयोजना हुने भएको छ। दक्षिण एसियाली फुटबल महासंघ (साफ)ले आइतबार यू–१९ साफ च्याम्पियनसिप नेपालमा हुने जनाएको हो।
साफका अनुसार प्रतियोगिता आगामी जुलाई ७ देखि १७ सम्म आयोजना हुनेछ। नेपालले यसअघि सन् २०१५ मा पनि यू–१९ साफ च्याम्पियनसिप आयोजना गरेको थियो। जसमा नेपाल च्याम्पियन बनेको थियो।
प्रतियोगितामा नेपालसहित दक्षिण एसियाका बंगलादेश, भुटान, भारत, माल्दिभ्स र पाकिस्तान सहभागी हुनेछन् । प्रतियोगितामा श्रीलंका भने सहभागी हुने छैन । फिफाले श्रीलंकामाथि प्रतिबन्ध लगाएका कारण त्यो प्रतिबन्ध नहटेसम्म उसले साफका कुनै पनि प्रतियोगिता खेल्न पाउने छैन।
यसैगरी साफ च्याम्पियनसिप यसै वर्ष भारतमा आयोजना हुने छ । मिति भने टुंगो लागेको छैन।
यस्तै, साफले साफ यू– १७ वुमन्स् च्याम्पियनसिप बंगलादेशमा मार्च २० देखि २८ सम्म गर्ने निर्णय पनि गरेको छ। साफ यू–१६ च्याम्पियनसिप १ देखि ११ सेप्टेम्बरमा भुटानमा आयोजना हुने भएको छ।
