फुटबलको दुनियाँमा नेमार एक यस्तो नाम हो, जसले आफ्नो अद्भुत कौशल, गति र रचनात्मकताले करोडौं समर्थकको मन जितेको छ। तर, उनको करियरको एउटा अविभाज्य हिस्सा बनेको छ– चोट।
सन् २०२५ सम्म आइपुग्दा यी ब्राजिलियन सुपरस्टार नेमारको चोटको कथा उनको सफलताको कथाजत्तिकै चर्चित बनेको छ। हामी यहाँ जादुयी फुटबलर नेमारको पछिल्लो चोट, त्यसको प्रभाव र उनको करियरमा चोटले पारेको असरबारे चर्चा गर्नेछौं।
पछिल्लो चोट र सन्तोस पुनरागमनपछिको चुनौती
सन् २०२५ को मार्चमा नेमारले आफ्नो बाल्यकालको क्लब सन्तोसमा फर्किए । त्यसले ब्राजिलियन फुटबलमा नयाँ उत्साह ल्याल्यो। तर, यो उत्साह लामो समय टिक्न सकेन। कारण थियो– नेमारको चोट।
मार्च २ मा भएको एक खेलका क्रममा नेमारले ‘डिस्कम्फर्ट’ महसुस गरे। उनको तिघ्रमा केही समस्या देखिएको थियो। सोही कारण उनी दोस्रो हाफमा मैदान छाड्न बाध्य भए। त्यसको केही दिनपछि साओ पाउलो च्याम्पियनसिपको सेमिफाइनलमा कोरिन्थियन्सविरुद्धको खेलमा उनी बेन्चमा बसे। सन्तोसका प्रशिक्षक पेद्रो काइसिन्हाले नेमारको यो चोटलाई ‘समान्य’ मात्र भने पनि यसले नेमारको ब्राजिलयको राष्ट्रिय टोलीमा १८ पछिको बहुप्रतिक्षित पुनरागमनमा ठूलो धक्का पुर्यायो।
सोही चोटका कारण मार्च २० मा कोलम्बिया र मार्च २५ मा अर्जेन्टिना हुने विश्वकप छनोट खेलअघि नै नेमार ब्राजिलिय टिम छाड्न बाध्य भए। ब्राजिलका प्रशिक्षक डोरिभल जुनियरले उनको स्थानमा रियल म्याड्रिडका युवा स्टार एन्ड्रिकलाई टोलीमा समावेशका थिए।
ब्राजिलको टिमबाट बाहिरिएपछि नेमारले इन्स्टाग्राममा लेखे– ‘पुनरागमन निकट थियो, तर दुर्भाग्यवश अहिले म विश्वको सबैभन्दा महत्त्वपूर्ण जर्सी लगाउन सक्दिनँ। हामीले जोखिम नलिने सहमति गरेका छौं।’
चोटको इतिहास : एक दुखद् संयोग
नेमारको करियरमा चोट नौलो कुरा होइन। सन् २०१४ को विश्वकपमा कोलम्बियाविरुद्धको क्वार्टरफाइनलमा उनको ढाडमा लागेको चोटले उनलाई टोलीबाट बाहिर राख्यो, जुन ब्राजिलको ७–१ को हारको खेलअघिको ठूलो झट्का थियो। त्यो चोट केही तलमाथि मात्र भएको भए उनको फुलटबल करिअर नै समाप्त हुने थियो। तर, संयोगले उनी पुनः मैदान फर्कन सफ भए।
नेमार मैदान त फर्किए, तर उनलाई चोटले भने छाडेन। त्यसपछि उनको कुनै सिजन यस्तो रहेन– चोटले नसताएको होस्।
नेमार सन् २०१७ मा बार्सिलोना छाडेर पीएसजी पुगे। त्यहाँ उनलाई चोटले झन सतायो। उनले खुट्टाको हड्डी भाँचिने, मांसपेशीमा चोट लाग्ने जस्ता समस्या खेपिरहे। ६ सिजन पिएसजीमा बिताउँदा उनले १७६ खेल मात्र खेल्न सके। बार्सिलोनमा (लियोन) मेसी र (लुइस) सुआरेजको छायामा परेर पिएसपी पुगेका नेमार त्यहाँ चोटको छायामा परे।
सन् २०२३ मा उनी पिएसजी छाड्नै साउदी क्लब अल हिलालमा पुगे । त्यहाँ उनले एसीएल (एन्टेरियर क्रुसिएट लिगामेन्ट) च्यातिने जस्ता गम्भीर चोटहरूको सामना गरे। २ सिजनमा उनले अल हिलालका लागि ७ खेल मात्र खेल्न सके। सन् २०२३ अक्टोबरमा उरुग्वेविरुद्धको विश्वकप छनोट खेलमा लागेको चोटले उनी झन्डै डेढ वर्ष मैदानबाहिर रहे।
रोचक तथ्य के छ भने अधिकांश समय नेमार आफ्नी बहिनी राफाएलाको जन्मदिन (मार्च ११) आसपास घाइते हुने गरेका छन्। यो संयोगले फुटबल प्रशंसकहरूबीच ‘बहिनीको जन्मदिनको नेमारका लागि श्राप’ हो भन्ने चर्चा हुने गरेको छ। सन् २०२५ मा पनि उनको चोट मार्चको सुरुमा भएको थियो, जसले यो कुरालाई थप बल दिएको छ।
करियरमा प्रभाव : सुनौलो अवसर गुम्दै
नेमार ब्राजिलका सर्वकालिक सर्वाधिक गोलकर्ता हुन्। उनले १२८ खेलमा ७९ गोल गरेका छन्। तर, बारम्बारको चोटले उनको करियरमा ठूलो असर पारेको छ।
सन् २०२२ को विश्वकपमा पनि उनी पूर्ण रूपमा फिट थिएनन्। ब्राजिल क्वार्टरफाइनलबाट बाहिरियो। अल–हिलालमा उनको बलाई पनि चोटले प्रभावित भयो, जहाँ उनले १८ महिनामा जम्मा ७ खेल खेले।
गत जनवरीमा सन्तोसमा फर्किएपछि उनले ७ खेलमा ३ गोल र ३ असिस्ट गरेर आफ्नो पुरानो लय समात्ने संकेत दिएका थिए, तर यो पछिल्लो चोटले फेरि प्रश्नचिह्न खडा गरेको छ।
फुटबल विश्लेषकहरू भन्छन्– ‘नेमार उत्कृष्ट छन्, उनी निर्विवाद प्रतिभाशाली छन्, तर शारीरिक अवस्थाले उनलाई विश्वको सर्वश्रेष्ठ खेलाडी बन्नबाट रोकेको छ।’ यदि उनी फिट रहन सकेका भए, लियोनेल मेसी र क्रिस्टियानो रोनाल्डोसँगै उनको नाम पनि सुनौलो अक्षरमा लेखिन सक्थ्यो।
नेमारको मानसिकता र भविष्य
सन् २०२३मा उरुग्वे विरुद्धको खेलमा घाइते भएपछि नेमारले आफ्नो भावना व्यक्त गर्दै भनेका थिए, ‘यो निकै दुखद क्षण हो। मलाई थाहा छ म बलियो छु, तर यसपटक मलाई परिवार र साथीहरूको धेरै साथ चाहिन्छ। चोट र शल्यक्रिया सहन सजिलो छैन।’
उनले आफ्नो विश्वास र धैर्यताको कुरा गरे पनि प्रशंसकहरू चिन्तित छन् कि उनको करियर अब अन्तिम चरणमा पुगिसकेको हुन सक्छ।
सन् २०२६ को विश्वकप अझै टाढा छ। र नेमार ३४ वर्षका हुनेछन्। यदि उनी पूर्ण रूपमा फिट भएर फर्किए भने ब्राजिलका उनको अनुभव र नेतृत्व अमूल्य हुन सक्छ। तर, यो सम्भावना उनको शारीरिक र मानसिक तयारीमा निर्भर छ।
सन्तोस र ब्राजिल दुवैले उनको स्वास्थ्यलाई प्राथमिकता दिँदै जोखिम नलिने रणनीति अपनाएका छन्, जुन दीर्घकालीन रूपमा फाइदाजनक हुन सक्छ।
नेमारको चोटको कथा उनको फुटबल यात्राको दुखद तर महत्त्वपूर्ण हिस्सा बनेको छ। उनको प्रतिभाले विश्वलाई मोहित पारे पनि चोटले करियरलाई पटक–पटक अवरुद्ध गरेको छ।
अब प्रश्न यो छ– के उनी यो चुनौतीलाई पार गरेर फेरि उही जादुमयी नेमार बन्न सक्लान्? समय र उनको दृढताले मात्र यसको जवाफ दिनेछ।
तर, एउटा कुरा निश्चित छ, नेमारको कथा अझै सकिएको छैन, र फुटबल प्रेमीहरू उनको पुनरागमन र जादुयी खेल हेर्न प्रतीक्षामा छन्।