नेपाल प्रिमियर लिग (एनपिएल) टिम कर्णाली याक्सले ट्यालेन्ट हन्डबाट ५ उदीयमान क्रिकेटर छनोट गरेको छ।
वीरेन्द्रनगरमा भएको छनोट प्रतियोगितामा गरेको प्रदर्शनका आधारमा कर्णालीले ५ उदीयमान क्रिकेटर छनोट गरेको हो।
जसमा मनिष थापा, निश्चल रावल, विपिनप्रसाद शर्मा, राजप्रसाद शाह र अरविन्द घर्ती छन्। उनीहरूले प्रदेशबाट राष्ट्रिय प्रतियोगिता खेलिसकेका छन्।
अब अन्तिम चरणको छनोटबाट यी पाँचमध्ये एक जनाले एनपिएलमा कर्णाली याक्सको प्रतिनिधित्व गर्न पाउने छन्। अबको केही दिनमै ‘आइकोनिक प्लेयर्स’ घोषणा गरिने गर्नेछ।
ज्ञानेन्द्र मल्ल प्रशिक्षक रहेको कर्णालीको मार्की खेलाडीमा राष्ट्रिय टिमका अलराउन्डर सोमपाल कामी छन्। कर्णाली याक्सले गत साता विश्व क्रिकेटकै चर्चित खेलाडी शिखर धवनलाई टोलीमा अनुबन्ध गरेको थियो।
यस्तै, टिममा वेष्ट इन्डिजका चादविक वाल्टन, पाकिस्तानका अलराउन्डर मोहम्मद हुसैन तलात र हङकङका बाबर हायतले पनि छन्।
कर्णालीमा गुल्शन झा, देव खनाल, अर्जुन घर्तीसहित रित गौतम, मौसम ढकाल र भुवन कार्कीलगायत खेलाडी पनि छन्।
प्रतियोगिता मंसिर १५ देखि पुस ६ सम्म हुँदैछ । प्रतियोगितामा कर्णालीले पहिलो खेल डिसेम्बर २मा जनकपुर बोल्ट्ससँग खेल्नेछ।