प्रधानमन्त्री कप एकदिवसीय क्रिकेटमा विभागीय टिम एपिएफ क्लबले तेस्रो जित निकालेको छ। आइतबार सिद्धार्थ क्रिकेट रंगशालामा भएको खेलमा दीपक बोहराको अर्धशतक मद्दतमा एपिएफले कर्णाली प्रदेशलाई ५ विकेटले हरायो।
१९० रनको लक्ष्य एपिएफले ३९.२ ओभरमा ५ विकेटको क्षतिमा भेट्टायो। उसका लागि दिपक बोहराले अर्धशतक बनाए। उनले ६७ बलमा ८ चौका र ४ छक्का मद्दतमा नटआउट ७० रन बनाए।
यस्तै, सुमित महर्जन ३४ रन बनाउँदा आसिफ सेखले २५ तथा लोकेश बम र कप्तान रोहित पौडेलले समान २२ रनको योगदान दिए। बलिङमा कर्णालीका दीपेन्द्र रावत र दिवान पनुले समान २ विकेट लिए।
त्यसअघि पहिला ब्याटिङ गरेको कर्णाली ४७ ओभरमा १८९ रनमा अलआउट भयो। कर्णालीका लागि सुनिल धमलाले सर्वाधिक ४७ रन बनाए भने दिनेश अधिकारीले ३३, दीपेन्द्र रावतले ३० र प्रकाश जैशीले २० रन बनाए।
बलिङमा एपिएफका अभिषेक गौतमले ४ विकेट लिँदा कमलसिंह ऐरीले २ विकेट लिए।
चार खेलमा तेस्रो जित निकालेको एपिएफ ६ अंकसहित तेस्रो स्थानमै छ। ऊ एकमात्र खेलमा पुलिस क्लबसँग पराजित भएको थियो। यता, कर्णालीको भने तेस्रो हार हो। ऊ २ अंकसहित आठौं स्थानमा छ।