आईपिएलमा दिल्ली क्यापिटल्सले विजयी सुरुआत गरेको छ। सोमबार राति विशाखापटममा भएको खेलमा आशुतोष शर्माले विस्फोटक ब्याटिङ गरेपछि दिल्लीले लखनउ सुपर जायन्ट्समाथि १ विकेटको रोमाञ्चक जित निकाल्यो।
२१० रनको ठूलो लक्ष्य दिल्लीले ३ बल बाँकी छँदा ९ विकेटको क्षतिमा भेट्टायो। दिल्लीको सुरुआत भने राम्रो हुनसकेन। पहिलो ओभरमै २ विकेट गुमाएको उसले पावप्लेमा ४ विकेट गुमाएको थियो। आशुतोष र विपराज निगमले उत्कृष्ट ब्याटिक गरेपछि उसको जित सम्भव भयो।
नटआउट रहेका आशुतोषले ३१ बलमा समान ५ चौका र छक्का प्रहार गर्दै ६६ रन बनाँदा विपराजले आईपिएलको डेब्यू खेलमै १५ बलमा ५ चौका र २ छक्का मद्दतमा ३९ रन बनाए। यी दुईले सातौं विकेटका लागि २२ बलमा ५५ रनको साझेदारी गरेका थिए।
यस्तै, ट्रिस्टन स्टब्सले २२ बलमा १ चौका र ३ छक्का मद्दतमा ३४ रन बनाउँदा फाफ डु प्लेसिसले १८ बलमा ३ चौका र २ छक्का मद्दतमा २९ र कप्तान अक्षर पटेलले ११ बलमा २२ रनको इनिङ खेले।
आफ्नो नियमति फास्ट बलरहरू मयंक यादव, अभेश खान घाइते भएपछि लखनऊ दबाबमा परेको थियो। उसले केही दिनअघि मात्र मोसिन खानको टिममा राखेको शार्दुल ठाकुरलाई सुरुआतमै खेलाएको थियो। सँगै उसले फास्ट बलरका रुपमा प्रिन्स यादवलाई खेलाएको थियो।
उसका लागि शार्दुल, मनिमरन सिद्धार्थ, दिग्वेश राठी र रवि विस्नोईले समान २ विकेट लिए।
त्यसअघि पहिले ब्याटिङ गरेको २० ओभरमा ८ विकेट गुमाएर २०९ रन बनाएको थियो। दिल्लीले उत्कृष्ट सुरुआत गरेपछि फिनिसिङ राम्रो गर्न नसक्दा अझै ठूलो स्कोर भने बनउन सकेन। १३ ओभरमै १६१÷२को बलियो अवस्थामा रहेको उसले त्यसपछि ७ ओभरमा उसले ६ विकेट गुमाउँदै ४८ रन मात्र जोड्न सकेको थियो।
उसका लागि निकोलस पूरनले सर्वाधिक ७५ रन बनाए। उनले ३० बलमा ६ चौका र ७ छक्का प्रहार गरे। यस्तै, मिचेल मार्शले ३६ बलमा समान ६ चौका र छक्का मद्दतमा ७२ रन बनाए भने डेविड मिलरले १९ बलमा २७ रन बनाए।
बलिङमा दिल्लीका मिचेल स्टार्कले २ विकेट लिँदा कुलदीप यादवले २ विकेट लिए।