नेपालका पूर्वकप्तान ज्ञानेन्द्र मल्लले नेपाल प्रिमियर लिग (एनपीएल)मा कर्णाली याक्सलाई प्रशिक्षण दिने छन्।
सोमबार आयोजित एक कार्यक्रमबीच कर्णालीले ज्ञानेन्द्रलाई मुख्य प्रशिक्षकसँगै निर्देशकमा नियुक्त गरेको जानकारी दियो।
कर्णालीको स्वामित्व हिमालयन बिल्डर्स एन्ड इन्जिनियर्सले लिएको छ।
ज्ञानेन्द्रले गतवर्ष नेपाली टोलीबाट सन्न्यास लिएका थिए। नेपाली क्रिकेट इतिहासका एक सफल ब्याटर उनी पटक पटक फ्रेन्चाइज लिगमा प्रशिक्षक बनेका हुन् ।
गत फागुनदेखि उनी नेपाल ए को प्रशिक्षक हुन्। उनले गत संस्करणकाे पिएम कपमा विभागीय टिम एपिएपफ क्लबकाे प्रशिक्षकका रूपमा काम गरेका छन्।
यस्तै, कन्सल्ट्यान्ट प्रशिक्षकमा राजु बस्न्यान नियुक्त भएका छन्। राजु कार्यक्रममै उपस्थित भएपनि नाम बोलाउँदा पनि स्टेजमा भने गएनन्।
उद्घोषकले उनलाई सहायक प्रशिक्षकका रुपमा ड्यासमा बोलाएका थिए। तर, उनी आफूसँग सल्लाह नै नगरी नाम घोषणा गरिएको भन्दै स्टेजमा जान मानेनन्। उनी केहीबेरपछि नै कार्यक्रम स्थलबाट बाहिरिएका थिए।
कार्यक्रममको समाप्तिमा राजुलाई मायाको चिनो प्रदान गर्नेबेलामा कन्सल्ट्यान्ट प्रशिक्षक रहेको बताइएको थियो।
कर्णालीमा मार्की खेलाडीमा सोमपाल कामी छन् ।
साेही कार्यक्रममा नाम र लाेगाे पनि सार्वजनिक गरियाे। कर्णाली अब कर्णाली याक्सकाे नामले चिनिनेछ।