दोस्रो संस्करणको केपी ओली कप टी–२० क्रिकेटको उपाधि गण्डकी हिरोजले जितेको छ।
मदन भण्डारी स्पोट्र्स एकेडेमीको आयोजनामा पोखरा रंगशाला क्रिकेट मैदानमा शुक्रबार भएको फाइनल खेलमा सिइसी काठमाडौंलाई ५ विकेटले हराउँदै च्याम्पियन बनेको हो। एपाधिसँगै गण्डकीले १० लाख रुपैयाँ प्राप्त गर्दा उपविजेता काठमाडौंले ५ लाख रुपैयाँ प्राप्त गरेको छ।
१८३ रनको लक्ष्य पाएको गण्डकीले १७.३ ओभरमा ५ विकेट गुमाउँदै १८५ रन बनायो। गण्डकीका वसन्त कार्की २७ र नारायण जोशी १३ रनमा नटआउट रहँदै टोलीलाई जित दिलाए।
बसन्तले १७ बलमा ३ छक्का प्रहार गरेभने, नारायणले १० बलमा १ छक्का प्रहार गरे। त्यसअघि किरण ठगुनाले ५२ रनको अर्धशतकीय पारी खेलेका थिए। सुजन थपलिया ३५ रन र दिपक डुुम्रे २६ रन बनाए।
काठमाडौंका लागि दिपेन्द्र रावतले ३ विकेट लिँदा मनोज यादव र सूर्य तामाङले १–१ विकेट लिए।
त्यसअघि टस जितेर ब्याटिङ थालेको काठमाडौंले १९.४ ओभरमा १८२ रन बनाउँदै अलआउट भयो। काठमाडौंका अर्जुन घर्तीले ६८ रन बनाए। उनले ३४ बलमा ४ चौका र ६ छक्का प्रहार गरे। यस्तै पृथु बास्कोटाले अर्धशतकीय पारि खेल्दै आउट भए । उनले २९ बलमा ७ चौका र २ छक्काको मद्दतमा अर्धशतक बनाए।
गण्डकीका लागि अमृत गुरुङ र कृष्टा पौडेलले समान ३–३ विकेट लिए भने विपिन खत्री र मिलन बोहोराले २–२ विकेट लिए।
काठमाडौंका दिपेन्द्र रावत प्लेयर अफ दी टुर्नामेन्ट घोषित भए । उनले ३० हजार रुपैयाँ प्राप्त गरे। उत्कृष्ट ब्याटर अत्तरियाका विपिन रावल र उत्कृष्ट बलर लुुम्बिनीका अजय कुमार चौहान घोषित हुँदै समान २०–२० हजार रुपैयाँ प्राप्त गरे।