जारी नेपाल प्रिमियर लिगमा पोखरा एभेन्जर्सले लिग सातौं स्थानमा सकायो । उसले लिगका ७ खेल मध्ये २ जित मात्र निकाल्न सक्यो।
जसमा पोखराले लुम्बिनी लायन्सलाई १० विकेट र विराटनगर किग्सलाई सुपरओभरमा हराएको थियो। उसका लागि रेमन राइफर, आन्द्रे गौस, दिनेश खरेल र विपिन खत्रीको प्रदर्शन मात्र सम्झना लायक रह्यो।
पोखरामा सबैभन्दा खराब लयमा देखिए, मार्की खेलाडी तथा कप्तान कुशल भुर्तेल। पोखरासँगै नेपाली क्रिकेटका समर्थकले कुशलको ब्याट थुप्रै रन बन्ने अपेक्षा गरेका थिए।
तर, सबैको अपेक्षा विपरित कुशल पुरै प्रतियोगितामा रनका लागि संघर्षरत देखिए। उनले ७ खेलमा मुस्किलले ५० रन घटाए। बलिङमा भने उनको प्रदर्शन राम्रै थियो।
आइतबार पोखर लिगको अन्तिम खेलमा सुदूरपश्चिम रोयल्ससँग ५ रनले पराजित भयो। खेलपछिको पोस्ट म्याच कन्फ्रेन्समा कुशलले आफ्नो प्रदर्शनबाट आफू सन्तुष्ट नरहेको बताए।
‘आफ्नो प्रदर्शनबाट सन्तुष्ट छैन, मैले एक–दुई खेलमा राम्रो ब्याटिङ गर्न सकेको भए अहिले टिमको अवस्था फरक हुनसक्थ्योे,’ उनले भने, ‘आफ्नो प्रदर्शन किन कमजोर भयो भनेर आफैँ बुझ्न सकिरहेको छैन।’
उनले कमजोर प्रदर्शनको जिम्मेवारी पनि आफैंले लिने बताए। टिममा युवा खेलाडीहरू धेरै भएको बताउँदै कुशलले धेरै कुरा सिक्ने अवसर मिलेको बताए। उनले दोस्रो सिजनमा थप बलियो भएर आउने प्रतिबद्धता व्यक्त गरे।
पोखराले टिमका रुपमा राम्रो गर्न नसकेपनि प्रतियोगिता निकै राम्रो भएको कुशल बताउँछन्। ‘टिमका रुपमा राम्रो नभएपछि जस्तो सोचेका थियौं प्रतियोगिता त्यस्तै भयो। जसरी प्रतियोगिता भयो, आयोजक हुनुहुन्छ, दर्शक आउनुभयो, सपोर्ट गर्दै हुनुहुन्छ, पहिलो सिजननै यति धेरै हाइप पाउन निकै राम्रो हो,’ पोस्ट म्याचनमा कुशलले भने।
साथै उनले कुशल मल्लको कप्तानी र खेलको प्रसंशान गरे। यस्तै, उनले दीपेन्द्रसिंह ऐरी, ललित राजवंशी, रिजन ढकाल, किशोर महतो, करण केसीको पनि तारिफ गरे।