नेपाल प्रिमियर लिगमा जनकपुर बोल्ट्सले बल र ब्याट् दुवैमा उत्कृष्ट प्रदर्शन गरिरहेको छ। लागतार तीन खेल जितेको जनकपुर अंकतालिकामा शीर्ष स्थानमा छ।
जनकपुरको सफलतामा नेपाली राष्ट्रिय टिमका सदस्य लेफ्टआर्म स्पिनर ललित राजवंशीको भूमिका महत्वपूर्ण छ। पावरप्लेमै बलिङमा आउने ललितले टिमलाई सुरुआतमै सफलता दिलाएका छन्।
बिहीबार ललितकै उत्कृष्ट बलिङमा जनकपुरले पोखरा एभेन्जर्समाथि ७ विकेटको जित निकाल्यो। खेलमा ३ विकेट लिएका ललित प्लेअर अफ दी म्याच भए।
प्रशिक्षकले दिएको भूमिका र टिमको आवश्यकता अनुसार नै आफूले बलिङ गरिएको ललितले बताएका छन्। पोस्टम्याच कन्फ्रेन्समा उनले प्रतिद्वन्द्वीअनुरूप मानसिक रूपमा नै तयारी भएर बलिङ गर्दा सफलता पाइरहेको बताए।
ललितले जारी प्रतियोगितामा कुल ७ विकट लिएका छन्। उनी सर्वाधिक विकेट लिनेको सूचीमा दोस्रो स्थानमा छन्।
राम्रो प्रदर्शन गर्दै टिमलाई जिताउन पाउँदा खुसी लागेको उनले बताए। यो प्रदर्शनलाई निरन्तरता दिने उनले बताए।
ललितले विदेशी र स्वदेशी खेलाडीले एक–आपसमा प्रोत्साहन गरिहँदा खेल्न सहज भएको बताए।
उनले प्रशिक्षक पुबुदु दसानायकेलाई घरेलु र एसोसिएट क्रिकेटरबारे राम्रो जानकारी भएकाले पनि सबै खेलाडीलाई खेल्न सहज भएको र टिम सफल भएको बताए।