नेपाली राष्ट्रिय ललित राजवंशी अहिले नेपाल प्रियिमर लिगको विजयी उत्सव मनाइरहेका छन्। जनकपुर बोल्ट्सले पहिलो संस्करणको एनपिएल उपाधि जितेपछि उसले अहिले मधेश प्रदेशमा विजयी उत्सव मनाइरहेको छ।
विजयी उत्सवमा ललितसहित टिमका खेलाडी र टिमका सदस्यहरु सहभागी छन्।
विजयी उत्सव मनाइरहेका ललितले एनपिएलले नेपाली क्रिकेटलाई चर्चाको शिखरमा पु¥याएको बताएका छन्। सञ्चारकर्मीहरुलाई प्रतिक्रिया दिँदै उनले नेपाली क्रिकेटले जति उपलब्धि हासिल गरेको छ, त्यसलाई संरक्षण गर्दै अझ सशक्त भएर अगाडि बढ्नु पर्ने बताएका छन्।
‘अहिलेसम्म नेपाली क्रिकेटले जति उपलब्धि हासिल गरेको छ, त्यसलाई संरक्षण गर्दै अझ बलियो भएर अगाडि बढ्नुपर्छ। मलाई विश्वास छ, यस्तै हुन्छ,’ उनले भने, ‘यही रफ्तारमा हामी अघि बढ्यौं भने खेलमै आत्मनिर्भर हुन्छौ। हामीले विश्वमञ्चमा सशक्त उपस्थिति जनाउने दिन पनि अब नजिक छ।’
एनपिएलमा समर्थकले निकै माया गरिहेको बताउँदै उनले यसबाट आफू निकै खुसी भएको बताएका छन्। यसले नेपाली क्रिकेट र समग्र खेल क्षेत्रमा सकारात्मक ऊर्जा प्रवाह गरिरहेको उनको भनाई थियो ।
एनपिएलमा उत्कृष्ट बलर घोषित भएका ललितले नेपालमा गाउँ–गाउँमा उत्कृष्ट प्रतिभाहरु भएको बताउँदै उनीहरू मैदानको अभावमा गुमनाम रहेको उल्लेख गरे। ती प्रतिभाहरुलाई बाहिर ल्याउन अभिभावका रुपमा रहेको तीनै तहको सरकारहरू गम्भीर भएर लाग्नु पर्ने उनले बताए।
ठाउँ–ठाउँमा मैदान बनाउँदै सरकारले खेलाडीको संरक्षण गर्नुपर्नेमा जोड दिँदै उनले प्रतिभावान खेलाडीहरू पलायन हुने गम्भीर र चिन्ताजनक कुरा भएकाे बताए। यो राज्यको कमजोरी भएको बताउँदै उनले यसतर्फ राज्य गम्भीर हुनुपर्नेमा उनले जोड दिए।