एसीसी प्रिमियर कपको सेमिफाइनल आज हुँदैछ। आज हुने पहिलो सेमिफाइनलमा आज नेपालले चिरपरिचित प्रतिद्वन्द्वी युएईको सामाना गर्ने छ।
खेल ओमानको अल अमेरात क्रिकेट मैदानको ओभल १ मा ११ः४५ बजे सुरु हुनेछ।
नेपाल समूह ‘ए’ बाट ४ खेलमा ८ अंकका साथ शीर्ष स्थानमा तथा युएई ४ खेलमा ३ मा जित र १ मा हारसहित ६ अंकका साथ दोस्रो स्थानमा रहेर सेमिफाइनलमा भिड्न लागेका हुन्।
नेपालले समूह चरणमा मलेसियालाई ५ विकेट, कतारलाई ३२ रन, हङकङलाई ८ विकेट र साउदी अरेवियालाई ६ विकेटले हराएको थियो । युएईले कुवेतलाई ७ विकेट, बहराइनलाई ३७ रन र कम्बोडियालाई ९ विकेटले हराएको थियो भने ओमानसँग युएई ९ विकेटले पराजित भएको थियो।
नेपाल २०२२ फेब्रुअरीमा यही मैदानमा आईसीसी टी–२० विश्वकप छनोट ए को सेमिफाइनल खेलमा युएईसँग ६८ रनले पराजित हुँदै बाहिरिएको थियो । नेपाललाई त्यस हारको समेत बदला लिने अवसर समेत छ।
युएईका ब्याटरको स्पिनरविरुद्ध त्यति राम्रो इतिहास छैन। त्यसैले दीपेन्द्र र ललितको स्पेल निर्णायक बन्न सक्छ।
नेपाल र युएईबीच ९ टी–२० आई खेल भएका छन् । नेपाल ५ मा जित र ४ मा पराजित भएको छ।