अस्ट्रेलिया भ्रमणमा रहेको नेपाली क्रिकेट टिम आज भएको दोस्रो अभ्यास खेलमा पनि पराजित भएको छ। बिहीबार भएको दोस्रो खेलमा नेपाल साउथ अस्ट्रेलियासँग ३ रनको झिनो अन्तरले पराजित भयो।
पहिला ब्याटिङ गर्दै साउदथ अस्ट्रेलियाले दिएको १६१ रनको मध्यम लक्ष्य पछ्याएको नेपालले इनिङको अन्तिम बलमा १५७ रनमै अलआउट भयो। टप र मिडल अर्डरमा भीम सार्कीबाहेक अन्य ब्याट्सम्यान नचल्दा नेपाल पराजित भयो।
भीमले २६ बलमा २९ रन बनाउँदा माथिल्थो क्रमका अन्य ब्याट्सम्यान सस्तैमा समेटिए। तर, लोअर मिडलअर्डरमा लोकेश बम र रुपेश सिंहले उत्कृष्ट ब्याटिङ गर्दै नेपाललाई जित नजिक लगेका थिए। रुपेशले १९ बलमा ४ चौका र २ छक्का मद्दतमा ३७ रन बनाँदा लोकेशले २६ बलमा २ चौका र १ छक्का मद्दतमा ३२ रन बनाए।
बलिङमा साउथ अस्ट्रेलियाका क्याम्पबेल थमसनले ४ ओभरमा १३ रन मात्र खर्चेर ४ विकेट लिए भने टम मेन्जिस, टिम ओक्ली र नोह म्याकफदेनले समान २ विकेट लिए।
त्यसअघि पहिला ब्याटिङ गरेको साउथ अस्ट्रेलियाले ८ विकेटको क्षतिमा १६० रन बनायो। उसका रायन किङले १९ बलमा ३४ रन बनाउँदा ड्यानिअल ड्रयू र ह्यारी मानेन्टीले समान २९ रन बनाए।
बलिङमा नेपालका करण केसीले ३ तथा साहब आलमले २ विकेट लिए।
यसअघि आजै भएको पहिलो खेलमा पनि नेपाल साउथ अस्ट्रेलियासँग ३ विकेटले पराजित भएइको थियो।
अब नेपालले शनिबार साउथ अस्ट्रेलियासँए एकदिवसीय खेल खेल्ने छ।