पहिलो पटक मोफसलमा आयोजना भएको प्रधानमन्त्री कप एदिवसीय क्रिकेटमा विभागीय टिम एपिएफले विजयी सुरुआत गरेको छ।
आइतबारदेखि लुम्बिनी प्रदेशमा सुरु भएको पिएम कपमा एपिएफले एक्स्ट्राटेक ओभल क्रिकेट मैदानमा बागमती प्रदेशमाथि १ सय रनको फराकिलो जित निकाल्यो।
एपिएफले दिएको १७५ रनको लक्ष्य पछ्याएको बागमतीले खराब ब्याटिङ गरेको थियो। ऊ २८.२ ओभरमा ७४ रनमै अलआउट भयो। उसका लागि शुभ कंसाकारले सर्वाधिक १६ रन बनाउनु बाहेक अन्यले दोहोरो अंकमा स्कोर बनाउन सकेनन्।
बागमतीको इनिङ धरासायी बनाउने क्रममा एपिएफका कमलसिंह ऐरीले घातक बलिङ गरे। चोटका कारण एनपिएल खेल्न नपाएका कमलले ८.२ ओभरमा २७ रन खर्चेर ४ विकेट लिए। यस्तै, कप्तान रोहित पौडेल र अमरसिंह राउटेलाले समान २ विकेट लिए।
त्यसअघि पहिला ब्याटिङ गरेको एपिएफ ४४ ओभरमा १७४ रनमा अलआउट भयो। उसका लागि सन्दीप जोराले सर्वाधिक ३७ रन बनाउँदा अमरसिंह राउटेला २६ रन र दिपक बोहराले २५ रन बनाए। अन्यको ब्याट भने चलेन्।
एपिएफका ब्याट्सम्यान संघर्ष गरेपछि बागमतीले खराब बलिङ गरेपछि उसले प्रतिस्पर्धात्मक योगफल बनाउन सक्यो। बागमतीले ५० अतिरिक्त रन दिएको थियो।
बलिङमा उसका रिजन ढकालले ५ विकेट लिँदा नन्दन यादवले ३ तथा सुर्य तामाङले २ विकेट लिए।