पहिलो पटक मोफसलमा सुरु भएको प्रधानमन्त्री कप एकदिवसीय क्रिकेटमा पहिलो दिन लुम्बिनी प्रदेश र कर्णली प्रदेश विजयी भएका छन्।
आइतबार सिद्धार्थ रंगशालामा भएको खेलमा लुम्बिनी प्रदेशले कोशी प्रदेशलाई २६ रनले हरायो। २०९ रनको लक्ष्य पछ्याएको कोशी ४२.४ ओभरमा १८२ रनमै अलआउट भयो।
कोशीका लागि सुजन थपलियाले सर्वाधिक ३५ रन बनाउँदा चिराग साहले ३१ रन बनाए। अन्यले भने गतिलो योगदान दिन सकेनन्। १५३–४ को बलियो अवस्थामा रहेको कोशीले त्यसपछि थप १९ रन जोड्दा ६ विकेट गुमाएको थियो।
कोशीको इनिङ धरासायी बनाउने क्रममा अजय चौहानले ८.४ ओभरमा ३२ रन खर्चेर ५ विकेट लिए भने रमेश कुर्मीले ३ तथा देव खनाल र कृष्ण कार्कीले समान १ विकेट लिए।
त्यसअघि पहिलो ब्याटिङ गरेको लुम्बिनी ४८ ओभरमा २०८ रनमा अलआउट भएको थियो। उसका आकाश त्रिपाठीले ६६ तथा नर सार्कीले ४५ रन बनाए।
कोशीका दिपेश कँडेल र प्रकाश कार्कीले समान ३ विकेट लिँदा फिर्दोश अन्सारीले २ विकेट लिए।
यस्तै, दाङको लमहीमा भएको खेलमा कर्णाली प्रदेशले सुदूरपश्चिम प्रदेशमाथि ७९ रनको सानदार जित निकाल्यो।
कर्णालीले दिएको १५६ रनको लक्ष्य पछ्याएको सुदूरपश्चिम २१ ओभरमा ७६ रनमा अलआउट भयो। सुदूरपश्चिमका लागि खडक बोहराले सर्वाधिक २७ रन बनाए भने किरण ठगुन्ना र शेर मल्लले समान १३ रन बनाए।
सुदूरपश्चिमको इनिङ धरासायी बनाउने क्रममा दिपेन्द्र रावतले ९ ओभरमा ३३ रन दिएर ७ विकेट लिए। यस्तै दिवान पुनले २ विकेट लिए ।
वर्षाले मैदान भिजेका कारण ४३ ओभरमा झारिएको खेलमा टस जितेर ब्याटिङ गरेको कर्णालीले ४०.४ ओभरमा अलआउट हुँदै १५५ रन बनाएको थियो ।
उसका अर्जुन घर्तीले सर्वाधिक ७१ रन बनाए । उनले ९४ बलमा समान २ चौका र छक्का प्रहार गरे। सुदूरपश्चिमका हेमन्त धामीले ९ ओभरमा २६ रन दिएर ४ विकेट लिए।