लुम्बिनी प्रदेशमा जारी एकदिवसीय क्रिकेटमा पहिलो सुपर ओभर भएको छ। सोमबार भैरहवास्थित सिद्धार्थ क्रिकेट मैदानमा भएको मधेश प्रदेश र गण्डकी प्रदेशबीचको खेल सुपर ओभरमा गएको हो।
सोमबार भएको खेलमा २४७ रनको लक्ष्य पछ्याएको गण्डकीले अन्तिम बलमा अलआउट हुँदै २४६ रन बनाए पछि खेल सुपर ओभरमा गएको थियो।
सुपर ओभरमा पहिला ब्याटिङ गरेको गण्डकीले रुपेश सिंहको ओभरमा २२ रन बनायो। २३ रनको ठूलो लक्ष्य पछ्याएको मधेशले ९ रन मात्र बनाउन सकेको थियो।
त्यसअघि निर्धारित ओभरमा मधेशले रोहन बिक, हरिशंकर शाह र रुपेश सिंहको अर्धतशक मद्दतमा ७ विकेटको क्षतिमा २४६ रन बनाएको थियो। उसका रोहनले ९८ बलमा ६४ रन बनाउँदा हरिशंकरले १०२ बलमा ५१ र रुपेशले ३२ बलमा ५१ रन बनाए।
बलिङमा गण्डकीका विपिन खत्री र कमल परियारले समान २ विकेट लिए।
अर्जुन कुमालको शतक मद्दतमा गण्डकीले पनि २४६ रन नै बनायो। अर्जुनले १४० बलमा १० चौका र १ छक्का प्रहार गर्दै १०६ रन बनाए। उनी पिएम कपमा शतक बनाउने कान्छा खेलाडी हुन्। उनीबाहेक दिनेश बुढामगर र सुदीप अर्यालले समान ३४ रन बनाउँदा कप्तान विपिन खत्रीले २६ रन बनाए।
बलिङमा मधेशका विशाल पटेलल ४ विकेट लिए।
यो हारसँगै मधेशको चौथो स्थानमा रहँदै जय ट्रफी खेल्ने योजनामा धक्का लागेको छ। ऊ ७ खेलमा २ जितसहित आठौं स्थानमा छ। यता, गण्डकीको यो नवौं खेलमा दोस्रो जित हो। ऊ नवौं स्थानमा छ।