प्रधानमन्त्री कप एकदिवसीय क्रिकेटमा मधेश प्रवेश विजयी भएको छ। एक्स्ट्रा टेक ओभलमा मंगलबार भएको खेलमा विशाल पटेलले घातक बलिङ गरेपछि मधेशले सुदूरपश्चिममाथि ४४ रनको सानदार जित निकाल्यो।
सुदूरपश्चिमले १०३ रनको झिनो लक्ष्य पनि पछ्याउन सकेन। ऊ १७.५ ओभरमा ५८ रनमै अलआउट भयो। उसका हेमन्त धामीले १९ रन बनाउनु बाहेक अन्यले दोहोरो अंकमा स्कोर बनाउन सकेनन्। उसका ५ ब्याट्सम्यान शुन्य रनमा आउट भएका थिए।
सुदूरपश्चिमको इनिङ ध्वस्त बनाउने क्रममा विशालले घातक बलिङ गरे। उनले ६ ओभरमा २ मेडनसहित १८ रन मात्र खर्चेर ६ विकेट लिए। यस्तै, पवन पासवानले ८ ओभरमा ३ मेडनसहित ७ रन मात्र खर्चेर ३ विकेट लिए।
त्यसअघि पहिला ब्याटिङ गरेको मधेश ४२.३ ओभरमा १०२ रनमा अलआउट भयो। उयसका लागि १०औं नम्बरमा ब्याटिका लागि आएका प्रदीप पासवानले सर्वाधिक २३, पवन सर्राफले १९ र दिपेश दासले १२ रन बनाउनु बाहेक अन्यले दोहोरो अंकमा स्कोर बनाउन सकेनन्।
२६.२ ओभरमा ६९–९को अवस्थामा रहेको मधेशलाई प्रदीप र रञ्जिन कुमारले १६.१ ओभरमा ३३ रनको महत्वपूर्ण साझेदारी गरेका थिए। रञ्जिनले ५१ बलमा ७ रन बनाए।
बलिङमा सुदूरपश्चिमका हेमन्त धामी र शेर मल्लले समान ४ विकेट लिए।
८ खेलमा ६ अंक जोडेको मधेश सातौं स्थानमा छ भने सामान ६ अंक नै जोडेको सुदूरपश्चिम आठौं स्थानमा छ।