प्रधानमन्त्री कप एकदिवसीय क्रिकेटको समूह चरणको अन्तिम विभागीय डर्बीमा त्रिभुनव आर्मी क्लब विजयी भएको छ। शनिबार भैरहवास्थित एक्स्ट्रा टेक ओभलमा भएको विभागीय डर्बीमा आर्मीले नेपाल पुलिस क्लबमाथि ४ विकेटको जित निकाल्यो।
पहिला ब्याटिङ गर्दै पुलिसले दिएको १४९ रनको सामान्य लक्ष्य आर्मीले ४१ ओभरमा ६ विकेटको क्षतिमा भेट्टायो। आर्मीको जितमा विवेक यादवले सर्वाधिक ४१ रन बनाउँदा तृतराज दासले २५, इमरान शेखले २३ र सन्तोष कार्कीले २२ रन बनाए।
बलिङमा पुलिसका ललित राजवंशी पुनः चम्किए। उनले १० ओभरमा २ मेडनसहित ३४ रन मात्र खर्चेर ४ विकेट लिए। जारी प्रतियोगिताका ९ खेलमा उलने कुल ४० विकेट लिएका छन्। यस्तै, दीपेन्द्रसिंह ऐरी र करण केसीले समान १ किवेट लिए।
त्यसअघि पहिला ब्याटिङ गरेको राम्रो ब्याटिङ गर्न सकेन। ऊ ४२.४ ओभरमा १४८ रनमै अलआउट भयो।
उसका लागि कप्तान दीपेन्द्रसिंह उेरीले अर्धशतक बनाए पनि अन्यले गतिलो योगदान दिन सकेनन्। दीपेन्द्रले ३७ बलमा ३ चौका र २ छक्का प्रहार गर्दै ५० रन बनाए। यस्तै, आरिफ सेखले २२, गुल्सन झाले १७ र सागर ढकालले १७ रनको इनिङ खेले।
बलिङमा आर्मीका साहब आलमले ४ विकेट लिए भने नरेन साउदले ३ विकेट लिए।
योसँगै पुलिसको अपराजित यात्रा १८ खेलपछि टुंगिएको छ। उसले अघिल्लो सिजन अपाजित रहँदै उपाधि जितेको थियो।