प्रधानमन्त्री एकदिवसीय क्रिकेटमा बागमती प्रदेशले खराब प्रदर्शनलाई निरन्तरता दिएको छ। आइतबार लमहीमा भएको खेलमा बागमतीले ११६ रनको झिनो लक्ष्य पछि पछ्याउन सकेन।
लुम्बिनीले दिएको ११६ रनको झिनो लक्ष्य पछ्याएको बागमती २२.५ओभरमा ६७ रनमै अलआउट भयो। उसका लागि कप्तान पृथु बास्कोटाले सर्वाधिक १५ रन बनाउँदा आशुतोष घिरैया र सुमन सुनारले समान ११ रन बनाउनुबाहेक अन्यले दोहोरो अंकमा स्कोर बनाउन सकेनन्।
बागमतीलाई सस्तैमा समेट्ने क्रममा लुम्बिनीका विप्रसन केसी र अजय चौहानले समान ३ विकट लिँदा निर्मल गुरुङ र रमेश कुर्मीले समान २ विकेट लिए।
त्यसअघि पहिला ब्याटिङ गरेको लुम्बिनीले पनि राम्रो ब्याटिङ गर्न सकेन। उ ३२.४ ओभरमा ११५ रनमै अलआउट भयो। उसका लागि आकाश त्रिपाठीले सर्वाधिक ३३ रन बनाउँदा मनिष थापा र कप्तान देव खनालले समान १५ रन बनाए।
बलिङमा बागमतीका गौतम केसीले ४ विकेट लिँदा सूर्य तामाङ र इशान पाण्डेले समान २ विकेट लिए। बागमतीले लुम्बिनीविरुद्ध आफ्ना स्टार बलरहरु प्रतिश जिसी र नन्दन यादवलाई बेन्चमै राखेको थियो।
प्रतियोगितामा लुम्बिनीको चौथो खेलमा तेस्रो जित हो । ऊ ६ अंकसहति चौथो स्थानमा छ। यता, बागमतीले भने ४ खेलमा १ जित मात्र निकालेको छ। २ अंकसहित ऊ नवौं स्थानमा छ।