लुम्बिनी प्रदेशमा जारी प्रधानमन्त्री कप एकदिवसीय क्रिकेटमा पहिलो शतकमा सुदूरपश्चिमका किरण ठगुन्नाले आफ्नो नाम लेखाएका छन्। दाङको लमहीस्थित देउखुरी क्रिकेट मैदानमा भएको खेलमा किरणले गण्डकी प्रदेशविरुद्ध शतक बनाएका हुन्।
किरणले १०१ बलमा ९ चौका र ६ छक्का मद्दतमा १२१ रनको उत्कृष्ट पारी खेले। उनको यही पारीको मद्दतमा खेलमा सुदूरपश्चिम ६ विकेटले विजयी भएको छ। गण्डकीले दिएको २२१ रनको चुनौतीपूर्ण लक्ष्य उसले ४३ ओभरमा ४ विकेटको क्षतिमा भेट्टायो।
किरणले कप्तान नारायण जोशीसँग पाँचौं विकेटका लागि ९४ रनको उत्कृष्ट साझेदारी गदैृ टिमलाई जित दिलाए। जसमा नारायाणले ४७ बलमा ४ चौका र १ छक्का मद्दतमा ३८ रन बनाए। यस्तै, खडक बोहराले १९ र निश्चन खत्रीले १८ रन बनाए।
बलिङमा गण्डकीका विपिन खत्री, अमृत गुरुङ, कमल परियार र अर्जुन कुमालले समान १ विकेट लिए।
त्यसअघि पहिला ब्याटिङ गरेको गण्डकीले ८ विकेटको क्षतिमा २२० रन बनाएको थियो। उसका लागि दीपक डुम्रेले सर्वाधिक ६० रन बनाए। उनले ७४ बलमा ३ चौका र १ छक्का प्रहार गरे।
यस्तै, अर्जुनले ९५ बलमा ४ चौका र १ छक्का मद्दतमा ५७ रन बनाए। यी दुई बाहेक सुदीप अर्यालले २३, वंश क्षेत्रीले १८ र दिनेश बुढामगरले १५ रन बनाए।
बलिङमा सुदूरपश्चिमका शेर मल्लले ३ विकेट लिँदा नारायण जोशीले २ विकेट लिए।
प्रतियोगितामा सुदूरपश्चिमको यो पहिलो जित हो। पहिलो खेलमा ऊ कर्णालीसँग पराजत भएको थियो। यता, गण्डकीको यो पहिलो खेल थियो।