प्रधानमन्त्री कप एकदिवसीय क्रिकेटमा डिफेन्डिङ च्याम्पियन नेपाल पुलिस क्लबले विजयी सुरुआत गरेको छ। सोमबार भैरहवास्थित एक्स्ट्रा टेक ओभलमा भएको खेलमा कुशल भुर्तेल र आरिफ सेखले अर्धशतक प्रहार गरेपछि पुलिसले लुम्बिनी प्रदेशमाथि ८७ रनको फराकिलो जित निकाल्यो।
पहिला ब्याटिङ गर्दै पुलिसले दिएको २५० रनको ठूलो लक्ष्य पछ्याएको लुम्बिनीले ९ विकेटको क्षतिमा १६२ रन मात्र बनाउन सक्यो। उसका लागि प्रज्ज्वल थापाले ७२ रनको उत्कृष्ट इनिङ खेले। उनले ९४ बलमा ७ चौका र १ छक्का प्रहार गरे।
यस्तै, मृनल गुरुङले ३० रनज बनाउनु बाहेक अन्यले राम्रो साथ नदिँदा लुम्बिनी पराजित भयो। बलिङमा पुलिसका सागर ढकालले ३ तथा ललित राजवंशी र कप्तान दीपेन्द्रसिंह ऐरीले समान २ विकेट लिए।
त्यअसघि टस जितेर पहिला ब्याटिङ गरेको पुलिसले कुलश र आरिफको अर्धशत मद्दतमा ६ विकेटको क्षतिमा २४९ रन बनाएको थियो। कुशलले ७५ बलमा ६ चौका र १ छक्का मद्दतमा ५९ रन बनाउँदा आरिफले ७९ बलमा २ छक्का मद्दतमा ५६ रन बनाए।
यस्तै, गुल्सन झाले ३६, दिलिप नाथले ३४ र अमित श्रेष्ठले २२ रनको इनिङ खेले। बलिङमा लुम्बिनीका कृष्ण कार्की र अजय चौहानले समान ३ विकेट लिए।
लुम्बिनीको यो पहिलो हार हो। यसअघि पहिलो खेलमा उसले कोशी प्रदेशलाई हराएको थियो।