लुम्बिनी प्रदेशमा जारी प्रधानमन्त्री कप एकदिवसीय क्रिकेटमा दुई विभागीय टिम नेपाल पुलिस क्लब र त्रिभुवन आर्मी क्लब विजयी भएका छन्।
बुधबार एकस्ट्राटेक ओभलमा भएको खेलमा पुलिसले कोशी प्रदेशलाई १५४ रनको फराकिलो अन्तरले हरायो। यो पुलिसको लागतार दोस्रो जित हो भने कोशीको लागतार तेस्रो हार हो।
२८९ रनको ठूलो लक्ष्य पछ्याएको कोशी ३६.२ ओभरमा १३४ रनमै अलआउट भयो। उसका लागि सुजन थपलिया नटआउट ३३ रन बनाउँदा कप्तान अंकित सुवेदीले २१, शकिब हकले १७ र फिर्दोश अन्सारीले १० रन बनाउनु बाहेक अन्यले दोहोरो अंकमा स्कोर बनाउन सकेनन्।
कोशीको इनिङ धरासायी बनाउने क्रममा पुलिसका करण केसीले ८ ओभरमा २९ रन दिएर ३ विकेट लिए भने ललित राजवंशी र कुशल भुर्तेलले समान २ विकेट लिए।
त्यसअघि टस जितेर पहिले ब्याटिङ गरेको पुलिसले ५० ओभरमा ८ विकेट गुमाएर २८८ रन बनाएको थियो। उसका लागि पुनः कुशल भुर्तेलको ब्याट चल्यो। उनले ७८ बलमा समान २ चौका र छक्का मद्दतमा ६५ न बनाए ।
त्यस्तै दिलिप नाथले ६४ बलमा ४ चौका र २ छक्का मद्दतमा ६१ रन बनाउँदा राशिद खान र अर्जुन साउदले समान ३८, कप्तान दिपेन्द्रसिंह ऐरीले ३२ तथा गुल्शन झाले २१ रन बनाए।
बलिङमा कोशीका भुपाल लुइँटेल ३ तथा प्रकाश कार्कीले २ विकेट लिए।
यस्तै, सिद्धार्थ रंगशालामा भएको खेलमा अर्को विभागीय टिम त्रिभुनव आर्मी क्लबले सुदूरपश्चिम प्रदेशमाथि ८ विकेटको जित निकाल्यो। ११८ रनको सामान्य लक्ष्य आर्मीले २ विकेटको क्षतिमा २३.५ ओभरमा भेट्टायो।
आर्मीका लागि सन्तोष कार्कीले ६३ बलम १० चौका मद्दतमा ५५ रन बनाए। यस्तै, तृतराज दासले ४८ बलमा ४ चौका र १ छक्का मद्दतमा ३१ रन बनाए भने कप्तान विनोद भण्डारीले २० रन बनाए।
बलिङमा सुदूरपश्चिमका शेर मल्ल र मिलन बोहराले समान १ विकेट लिए।
त्यसअघि पहिला ब्याटिङ गरेको सुदूरपश्चिम आर्मीको कसिलो बलिङ सामू४५.३ ओभरमा ११७ रनमा अलआउट भएको थियो। उसका निश्चल खत्रीले नटआउट ४९ रन बनाउँदा सुनिल साउद र नारायण जोशीले सामान १६ रन बनाए।
बलिङमा आर्मीका साहब आलमले १० ओभरमा २ मेडनसहित १९ रन मात्र खर्चेर ४ विकेट लिए भने सोमपाल कार्मीले २ विकेट लिए।
आर्मीको यो लागतार दोस्रो जित हो भने सुदूरपश्चिको दोस्रो हार हो।