इन्डियन प्रिमियर लिग (आईपिएल)मा रोयज च्यालेन्जर्स बेंग्लुरुले लागतार दोस्रो जित निकालेको छ। आइतबार भएको पहिलो खेलमा बैंग्लुरुले गुजरात टाइन्समाथि ९ विकेटको सानदार जित निकाल्यो।
विल ज्याक्सले विस्फोटक ब्याटिङ गर्दै शतक बनाएपछि बैंग्लुरुले २०१ रनको लक्ष्य १६ ओभरमै भेट्टायो। ज्याक्सले ४१ बलमा ५ चौका र १० छक्का प्रहार गर्दै नटआउट १०० रन बनाए। उनले दोस्रो विकेटका लागि विराट कोहलीसँग १६६ रनको साझेदारी गरे।
कोहलीले ४४ बलमा ६ चौका र ३ छक्का प्रहार गर्दै ७० रन बनाए भने कप्तान फाफ डु प्ल्ेसिसले १२ बलमा २४ रन बनाए। बैंग्लुरुको एकमात्र विकेट साई किशोरले लिए।
त्यसअघि पहिला ब्याटिङ गरेको गुजरातले निर्धारित ओभरमा ३ विकेटको क्षतिमा २ सय रन बनायो। गुजरातका लागि साइ सुदर्शनले ८४ रनको नटआउट पारि खेल्दा मोहमद सारुख खानले ५८ रनको पारि खेले ।
सुदर्शनले ४९ बलमा चार छक्का र आठ चौका प्रहार गरेका थिए । यसैगरी सारुख खानले ३० बलमा ५८ रन बनाउँदा ५ छक्का र ३ चौका प्रहार गरे।
यसैगरी डेभिड मिलरले नटआउट २६ रन बनाउँदा कप्तान शुभमन गिलले १६ रन बनाए । बेंग्लुरुका लागि स्वपनिल सिंह, मोहमद सिराज र ग्लेन म्याक्सवेलले समान एक एक विकेट लिए।
यो जितसँगै बैंग्लुरुको प्लेअफ सम्भावना कायमै छ।