कीर्तिपुरस्थित टियू मैदानमा फ्लडलाइट र प्यारापिट निर्माणका लागि बोलपत्र आह्वान गरिएको छ।
सहरी विकास मन्त्रालय अन्तर्गतको संघीय सचिवालय निर्वाण तथा व्यवस्थापन कार्यालयले अन्तर्राष्ट्रिय स्तरको प्यारापिट र फ्लडलाइटका लागि आज बोलपत्र आह्वान गरेको हो।
यसअघि २ पटक फ्लडलाइट निर्माणका लागि बोलपत्र आव्हान गरिएको थियो। कुनै पनि कम्पनीले निवेदन नहालेपछि दुवै पटक बोलपत्र रद्द गरिएको थियो।
बोलपत्रमा प्यारापिटका लागि १ करोड ६२ लाख र फ्लडलाइटका लागि १ करोड ७३ लाख रुपैयाँ लागत तोकिएको छ।
आगामी माघ ६ गते दिउँसो १२ः३० बजेसम्म प्यारापिटका लागि २० र फ्लडलाइटका १० हजार रुपैयाँ तिरेर बोलपत्र हाल्न सकिने छ।
सरकारले आर्थिक वर्ष २०७९÷८० को बजेटममै फ्लडलाइट जडानका लागि १० करोड छुट्याइएको थियो। तर, रकम खर्च हुन सकेको थिएन। यो आर्थिक वर्षमा फ्लडलाइटका लागि २० करोड विनियोजन भएको छ।