कारबाओ कपमा प्रिमियर लिग क्लब द्वय आर्सनल र लिभरपुलले सहज जित निकालेका छन्। सहज जितसँगै दुवै टिम चौथो चरणमा प्रवेश गरेका छन्।
बुधबार राति भएको खेलमा आर्सननले तेस्रो श्रेणीको क्लब बोल्टन वान्डर्सलाई ५–१ ले हरायो । खेलमा आर्सनलार्य सहज जित दिलाउन एथान नवानेरीले २ तथा डेक्लान राइस, रहिम स्टर्लिङ र काइ हाभार्टज पनि गोल गरेका थिए । खेलमा बोल्टनका आरोन जोन कोलिन्सले गोल फर्काएका थिए।
यस्तै अर्को खेलमा लिभरपुलले प्रिमियर लिगकै वेष्टहम युनाइटेडलाई ५–१ ले नै हरायो। लिभरपुलका लागि डिएगो जोटा र कोडी गाक्पोले २–२ गोल गर्दा मोहमद सालाहले एक गोल गरे।
लिग कपको चौथो चरणको ड्र पनि गएराति नै सार्वजनिक भएको छ ।
चौथो चरणमा अब लिभरपुलले ब्राइटनको भ्रमण गर्नेछ। यस्तै आर्सनलले प्रेस्टनलाई प्रतिद्वन्द्वी पाउँदा म्यानचेष्टर सिटी र टोटनहम चौथो चरणमै भीड्ने भएका छन्।
म्यानचेष्टर युनाइटेडले लेस्टरसँग प्रतिस्पर्धा गर्दा चेल्सीले विम्बलडन र न्युकासलबीचको विजेतासँग खेल्ने छ।