जर्मन बुन्डेस लिगामा डिफेन्डिङ च्याम्पियन बायर लेभरकुसनले विजयी सुरुआत गरेको छ। शुक्रबार राति भएको खेलमा लेभरकसुनले बोरुसिया मोन्चेनग्लाडबागलाई ३–२ले हरायो।
खेलमा लेभरकुसनले १२औं मिनेटमा अग्रता लिएको थियो। उसका ग्रानिट जाकाले गोल गरेका थिए। ३८औं मिनेटमा फ्लोरेन्ट विट्जले गोल गरेपछि लेभरकुसनले पहिलो हाफमै २–० को अग्रता लियो।
पहिलो हाफमा २ गोलले पछि परेको मोन्चेनग्लाडबागले दोस्रो हाफमा कमब्याक गरेको थियो। ५९औं मिनेटमा निको एलभेडीले गोल गर्दै उसलाई खेलमा फर्काएका थिए। ८५औं मिनेटमा टिम केलनडेनेस्टले गोल गरेपछि खेल २–२ को बराबरीमा आयो।
तर, अतिरिक्त समयको ११औं मिनेटमा विट्जले पेनाल्टीमा व्यक्तिगत दोस्रो गोल गर्दै लेभरकुसनलाई ३–२को रोमाञ्चक जित दिलाए। फ्लोरेन्टले प्रहार गरेको पेनाल्टी रिबाउन्ड भएर आउँदा गोलमा परिणत गरेका थिए।