चर्च बोइज युनाइटेड पोखरामा जारी आहा रारा गोल्डकपको क्वार्टरफाइनलमा प्रस्वेश गरेको छ। बिहीबार पोखरा रंगशालामा भएको खेलमा न्युरोड टिम (एनआरटी)लाई सडनडेथमा हराउँदै चर्च बोइज क्वार्टरफाइनलमा पुगेका हो।
निर्धारित समयको खेल १-१ गोलको बराबरीमा सकिएपछि खेलमा ३० मिनेट थप गरिएको थियो। तर, दुवै टिमबाट गोल नहुँदा खेल पेनाल्टीमा गएको थियो। पेनाल्टीमा चर्च बोइज ६-५ले विजयी भयो।
कुल १८ पेनाल्टी प्रहार भएको खेलमा चर्च ब्वाइज सडन डेथमा विजयी भएको हो । सुटआउटमा चर्च ब्वाइजका गोलकिपर टिकेन्द्र थापा नायक बने । उनले ३ पेनाल्टी बचाउनुका साथै पेनाल्टीमा गोल समेत गरे।
खेलमा अग्रता भने एनआरटीले लिएको थियो । खेलको २५औं मिनेटमा एनआरटीका रिचर्ड विल्सले गोल गर्दै टिमलाई अग्रता दिलाएका थिए । कृतिश रत्न छुन्जुले बक्सभित्रबाट हानेको प्रहार चर्च ब्वाइजका किपर टिकेन्द्रले रोकेका थिए । तर, पूर्ण रुपमा क्लियर नभएको बललाई विल्सनले ट्याप इन गर्दै गोलमा परिणत गरे।
६३औं मिनेटमा चर्च बोइजका नवीन लामाले गोल फर्काउँदै खेललाई सहज स्थितिमा ल्याए। चर्चब्वाइजले पाएको पेनाल्टीमा लामाले कुनै गल्ती गरेनन् र अवसरलाई गोलमा परिणत गरे।
चर्च ब्वाइजले अब विभागीय टोली त्रिभुवन आर्मी एफसीसँग क्वार्टरफाइनलमा प्रतिस्पर्धा गर्नेछ।
एनआरटीले आजै धरानमा बुढासुब्बा गोल्डकप पनि खेलेको थियो। आहा रारा गोल्डकपमा उसले कप्तान अञ्जन विष्टसहित पहिलाे रोजाईको टिम उतारेको थियो।