डिफेन्डिङ म्यानचेष्टर सिटीले इंग्लिस प्रिमियर लिगमा सादनरा जित निकालेको छ। शनिबार भएको खेलमा सिटीले लुटन टाउनलाई ५–१ ले हरायो।
यो जितसँगै सिटी शीर्ष स्थानमा उक्लिएको छ। उसको ३२ खेलमा ७३ अंक भएको छ। एक खेल कम खलेको आर्सनल र लिभरपुल समान ७१ अंकसहित दोस्रो र तेस्रो स्थानमा छन्। आज आर्सनलले एस्टनभिल्ला र लिभरपुलले क्रिस्टल प्यालेससँग खेल्नेछ।
खेलको दोस्रो मिनेटमै लुटनका दाइकी हाशिओकाले आत्मघाती गोल गरेपछि सिटीले अग्रता लिएको थियो । त्यसपछि सिटीले दोस्रो हाफमा चार गोल थप्यो ।
माटेओ कोभासिसले ६४औं, एर्लिङ हालान्डले ७६औं, जेरेमी डोकुले ८७औं र जस्को गार्भिओलले इन्जुरी टाइममा गोल गरे । लुटनका लागि रोस बार्केले ८१औं मिनेटमा एक गोल फर्काए ।
यस्तै अर्को खेलमा म्यानचेष्टरकै अर्को युनाइटेड भने बराबरीमा रोकिएको छ। ऊ बर्नमाउथसगँ २–२को बराबरी खेल्न बाध्य भयो। युनाइटेड ७ खेलयता जित निकाल्न असफल छ।
लिगकै अन्य खेलमा न्युक्यासल युनाइटेडले टोटनहमलाई ४–० ले हराउँदा ब्रेन्टफवर्डले शेफिल्ड युनाइटेडलाई २–० ले हरायो।