इटालियन सुपर कपको उपाधि एसी मिलानले जितेको छ। सोमबार राति साउदी अरेबियाको रियादमा भएको ‘मिलान डर्बी’ फाइनलमा इन्टरमाथि ३–२को जित निकाल्दै एसी मिलानले उपाधि जितेको हो।
खेलमा एसी मिलानले २ गोलले पछि परेको अवस्था उल्टाउँदै ३–२को सानदार जित निकालेको हो।
योसँगै नवनियुक्त प्रशिक्षक सर्जियो कोन्सेसाओले आफ्नो प्रशिक्षणका दोस्रो खेलमै टिमलाई उपाधि दिलाउन सफल भए। सुपरकप मार्फत नै उनले मिलानको प्रशिक्षण यात्रा थालेका हुन्।
एसी मिलानलाई च्याम्पियन बनाउन थिओ हर्नान्डेज, क्रिस्टियन पुलुसिच र टमी अब्राहमले गोल गरे। इन्टरका लाउटारो मार्टिनेज र मेहदी टेरेमीले गोल गरेका थिए।
खेलमा अग्रता भने इन्टरले लियो। उसले पहिलो हाफा इन्जुरी समयको पहिलो मिनेटमा मार्टिनेजले गोल गरेका थिए। दोस्रो हाफको खेल सुरु भएको २ मिनेट नबित्दै इन्टरले अग्रता दोब्बर बनायो। उसका टेरेमीले ४७औं मिनेटमा गोल गरेका थिए।
२ गोलले पछि परेको मिलानका लागि ५२औं मिनेटमा हर्नान्डेजले गोल गर्दै टिमलाई खेलमा फार्काए। त्यसपछि ८०औं मिनेटमा पुलुसिचले बराबरी गोल गरे। प्रतियोगितामा उनको यो दोस्रो गोल हो। उसले सेमिफाइनलमा युभेन्ट्सविरुद्ध पनि बराबरी गोल गरेका थिए।
खेल बराबरी तर्फ उन्मूख थियो। तर, इन्जुरी समयको तेस्रो मिनेटमा अब्राहमले गोल गर्दै इन्टरलाई स्तब्ध बनाउँदै मिलानलाई सिजनको पहिलो उपाधि दिलाए।
मिलानले कुनै उपाधि जितेको यो सन् २०१६ यता पहिलो पटक हो। उसले इटालियन सुपरकप जितेको भने आठौं पटक हो।