नेपाली राष्ट्रिय फुटबल टिमले आज मैत्रीपूर्ण खेलमा अफगानिस्तानको सामाना गर्दै छ। खेल ताजकिस्तानको सेन्ट्रल रिपब्लिकन स्टेडियम, डुसनबेमा नेपाली समय अनुसार साँझ ६ः४५ बजे सुरु हुनेछ।
लामो समयपछि जितबाट बञ्चित रहँदै आएको नेपाल अफगानिस्तानविरुद्ध ११ वर्षपछि मैदान उत्रँदा जितको खोजीमा हुनेछ। तर, पछिल्लो समय राम्रो फुटबल खेरिहहेको अफगानिस्तानविरुद्ध जित निकाल्न नेपाललाई त्यति सहज भने हुने छैन।
नेपाली टिमले यही मैदानमा ३ दिनअघि मात्र घरेलु टोली ताजकिस्तानसँग ४–०को फराकिलो हार व्यहारेको थियो। नेपाल आज त्यो हारलाई भुलाउन चाहन्छ।
फिफा वरियतामा अफगानिस्तान नेपालभन्दा ३० स्थान माथि छ। नेपाल १७६औं स्थानमा रहँदा अफगानिस्तान १५१औं स्थानमा छ।
हेड डु हेडमा अफगानिस्तानमाथि नेपाल हावी भएपछि उसलाई हराउन नेपालले उत्कृष्ट फुटबल खेल्नुपर्ने छ। नेपाल र अफगानिस्तानबीच अहिलेसम्म कुल ६ भीडन्त भएका छन्, जसमा नेपाल ३ खेलमा विजयी हुँदा २ खेल बराबरीमा सकिएको छ भने अफगानिस्तानले १ खेल जितेको छ।
यी दुई टिमबीच अन्तिम पटक सन् २०१३मा साफ च्याम्पियनसिपमा भेट भएको थियो। दशरथ रंगशालाममै भएको सेमिफाइनलमा रोहित चन्दले पेनाल्टी चुकाउँदा नेपाल १–०ले पराजित भएको थियो। अफगानिस्तान च्याम्पियन नै बनेको थियो।
आजको खेलमा नेपालका स्टार स्ट्राइकर अञ्जन विष्टलाई कीर्तिमान बनाउने अवसर छ। आज गोल गर्न सके उनी नेपालका लागि सर्वाधिक गोल गर्ने खेलाडी बन्ने छन्। अहिले उनले हरि खड्का र निराजन रायमाझीसँगै समान १३ गोल गरेका छन्।