चार देशीय अन्तर्राष्ट्रिय महिला च्याम्पियनसिप अन्तर्गत घरेलु टोली नेपालले आज आफ्नो दोस्रो खेलमा लेबनानसँग खेल्दैछ। खेल त्रिपुरेश्वरस्थित दशरथ रंगशालमा साँझ ६ बजे सुरु हुनेछ।
त्यसअघि पहिलो खेलमा म्यानमार र कीर्गिस्तानबीच दिउँसो २ बजे प्रतिस्पर्धा हुनेछ। चारै टोलीको यो दोस्रो खेल हुनेछ। पहिलो खेलमा म्यानमारले लेबनानलाई ३–१ ले तथा नेपालले कीर्गिस्तानलाई १–० ले पराजित गरेको थियो।
लेबनानसँग खेल्दा लगातार दोस्रो जित निकाल्दै नेपाल फाइनल पुग्ने लक्ष्यमा छ। तर, त्यसका लागि नेपालले कीर्गिस्तानसँग गरेको स्ट्राइकिङको कमजोरी भने सुधार गर्नुपर्ने हुन्छ। जसमा नेपालले थुप्रै गोलका अवसर सिर्जना गरेपनि १ गोल मात्र गर्न सकेको थियो।
पहिलो खेलमा देखिएको कमजोरीलाई दोस्रो खेलमा सुधार गर्दै राम्रो प्रदर्शन गर्ने लक्ष्यमा नेपाल छ। नेपालका मुख्य प्रशिक्षक राजेन्द्र तामाङले लेबनानविरूद्ध जितकै लागि खेल्ने र फरक रणनीतिका साथ मैदान उत्रने बताएका छन्।
अहिले खेलिरहेका चार टोलीमध्ये वरियतामा सबैभन्दा तल लेबनान छ भने तुलनात्मक रुपमा कीर्गिस्तानलाई कमजोर टोली मानिएको थियो । यद्यपी पहिलो खेलमा लेबनान र कीर्गिस्तान दुवैले विपक्षीलाई सहजै जित्न भने दिएनन्।
लेबनानका प्रशिक्षक वेल घार्जेदिनले पहिलो खेलमा म्यानमारसँग हारपछि नेपालविरूद्ध दोस्रो खेलमा केही परिवर्तन हुने बताएका थिए । नेपालविरुद्ध विदेशी लिग खेलेर सोमबारै मात्र काठमाडौं आइपुसगेका लेबनानका तीन खेलाडीले पहिलो रोजाईमा खेल्ने छन्।
फ्रान्समा खेल्ने फरवार्ड क्रिस्ट मालुफ तथा अष्ट्रेलियाको वेलिङग्टन पोएनिक्सबाट खेल्ने डिफेण्डर टिएना जाबेर र मिडिल्डिर मिया गिलले पहिलो खेल खेलेनन्। यी तीनै खेलाडी लेबनानको पहिलो रोजाइमा खेल्ने खेलाडीहरू हुन्।
म्यानमार र नेपालले आफ्नो पहिलो खेल जितेकोले आज दोस्रो जित हात पारे एक खेल अघि नै सेमिफाइनल पुग्नेछ।