ला लिगाको शीर्ष दुई स्थानमा रहेका रियल मड्रिड र एट्लेटिको मड्रिडबीचको खेल बराबरी भएको छ। रियलको घरेलु मैदान सान्टियागो बर्नाबेउमा भएको मड्रिड डर्बीमा १–१ गोलको बराबरी भएको हो।
ला लिगको २३औं चरणको खेलमा स्पेनका शीर्ष दुई टिम भिडेका थिए। उपाधि होडमा महत्वपूर्ण मानिएको खेलमा जुलियन अल्भारेजले एट्लेटिकोलाई सुरुवाती अग्रता दिलाएका थिए। ३५औं मिनेटमा पाएको पेनाल्टीबाट गोल गर्दै उनले सुरुवाती अग्रता दिलाएका हुन्।
रियल मड्रिडका लागि किलियन एम्बाप्पेले बराबरी गोल गरे। रोड्रिगोको सट रिबाउन्ड भएर पाएको मौकाको सदुपयोग गर्दै एम्बाप्पेले ५०औं मिनेटमा खेल बराबरी गरेका हुन्।
बराबरीपछि रियल मड्रिड ला लिगाको शीर्षस्थानमा कायमै छ। २३ खेलमा १५ जीत, ५ ड्र र ३ हारका साथ ५० अंक जोड्दै रियल शीर्षस्थानमा रहेको हो। यस्तै, दोस्रो स्थानमा रहन सफल एट्लेटिकोले समान खेलमा १४ जीत, ७ ड्र र २ हारको नतिजासहित ४९ अंक जोडेको छ। तेस्रो स्थानमा रहेको बार्साले एक खेल कम खेलेर ४५ अंक जोडेको छ।