सावित्राले राष्ट्रिय लिगका बाँकी खेल गुमाउने

नेपाली राष्ट्रिय महिला फुटबल टिमकी स्ट्राइकर सावित्रा भण्डारी घाइते भएकी छिन् । घाइते भएपछि सवित्राले राष्ट्रिय महिला लिगका एपिएफका बाँकी खेल गुमाउने भएकी छिन् ।

सोमबार भएको विभागीय भीडन्तमा पुलिसविरुद्धको खेलमा सावित्रा घाइते भएकी थिइन् । लगातार १० जित निकालेको एपिएफ उपाधि नजिक छ ।

६९औं मिनेटमा पुलिसकी गोलकिपर उषा नाथसँग ठोक्किएपछि सावित्रा घाइते भएकी थिइन् । बल हान्ने क्रममा ल्याण्डिङ नमिलेर उनको खुट्टामा चोट लागेको थियो । उनको एमआरआई गरिएको र रिपोर्ट आएपछि मात्रै उनको चोटको बारे भन्न सकिने एपीएफकी मुख्य प्रशिक्षक भगवती थापाले जानकराी दिइन् ।

सावित्राले गोल गर्न नसके पनि प्रतिस्पर्धात्मक खेल २-१ ले जित्दै एपीएफ उपाधि नजिक पुगेको छ । सावित्राले १० खेलमा ४३ गोल गरिसकेकी छिन् । पुलिस विरुद्ध भने उनी घाइते हुँदै मैदान छाड्न बाध्य भइन् । उनकै स्थानमा मैदान प्रवेश गरेकी रविना गोलेले निर्णायक गोल गर्दै एपीएफलाई जित दिलाइन् ।

शतप्रतिशत जितसहित १० खेलबाट ३० अंक जोडेको एपीएफ उपाधि नजिक पुगेको छ । आर्मी समान खेलबाट २५ अंकसहित दोस्रो स्थानमा छ ।

एपीएफले अब विराटनगरसँग अर्को खेल खेल्दैछ । उक्त खेलमा सावित्रा नखेल्ने लगभग पक्का छ । एपीएफकी प्रशिक्षक भगवती थापाले सावित्राले अबको खेल नखेल्ने बताइन् । ‘उनले अबको दुई म्याच खेल्न सक्दिनन् । खुट्टा फोल्ड गर्न सक्ने अवस्थामा उनी छैनन् । त्यसैले खेल्ने सम्भावना कम छ । सायद हामी उनलाई खेलाउँदैनौँ ,’ थापाले भनिन् ।

एपीएफले अब विराटनगरसँगको खेल जितेमा त्रिभुवन आर्मी फुटबल क्लबसँग खेल्नुअघि नै उपाधि जित्नेछ । त्यसका लागि विराटनगरसँग जित्नु पर्ने वा बराबरी खेल्नुपर्ने थापाले बताइन् । ‘विराटनगरको गेम पनि हाम्रो लागि भाइटल नै छ । उपाधि जित्न अब विराटनगरलाई जित्यो भने हुन्छ । त्यो म्याच जित्नुपर्‍यो वा ड्र हुनुपर्‍यो, हार्नु भएन । थापाले भनिन् । हार्ने चान्स भन्दा नि खेल हो प्रतिस्पर्धा हुन्छ ।’

Facebook Comments Box

Leave a Reply

Your email address will not be published.