कर्णाली प्रदेशको सुर्खेतमा शुक्रबारदेखि सुरु भएको एन्फा महिला लिग छनोटमा कोशी र सुदूरपश्चिम प्रदेशले विजयी भएका छन्।
कर्णाली रंगशालामा भएको उद्घाटन खेलमा सुदूरपश्चिमले गण्डकी प्रदेशलाई ५–१ ले हरायो। सुदूरपश्चिमका लागि मिना देउवाले दुई तथा बिर्सना चौधरी, रिना चन्द र गंगा चौधरीले एक एक गोल गरिन्। गण्डकीका लागि सुस्मिता गुरुङले एक गोल फर्काइन्।
यस्तै दोस्रो खेलमा कोशी प्रदेशले घरेलु टोली कर्णाली प्रदेशलाई ३–० ले हरायो। उसका जेनिफर राना, पूर्णिमा राना र झुमा विश्वकर्माले गोल गरे।
महिला लिग छनोटमा सात प्रदेशको सहभागिता छ। सिंगल राउण्ड रोविन लिगको खेलपछि शीर्ष तीनमा रहने टोली महिला राष्ट्रिय लिगमा छनोट हुनेछ।